میں وہ صحرا جسے پانی کی ہوس لے ڈوبی

تو وہ بادل جو کبھی ٹوٹ کے برسا ہی نہیں

فرصت میں رہا کرتے ہیں فرصت سے زیادہ

مصروف ہیں ہم لوگ ضرورت سے زیادہ

اک خوف بے پناہ ہے آنکھوں کے آر پار

تاریکیوں میں ڈوبتا لمحہ ہے سامنے

سفر سفر مرے قدموں سے جگمگایا ہوا

طرف طرف ہے مری خاک جستجو روشن

سب کے ہونٹوں پہ منور ہیں ہمارے قصے

اور ہم اپنی کہانی بھی نہیں جانتے ہیں

سامنے آنکھوں کے پھر یخ بستہ منظر آئے گا

دھوپ جم جائے گی آنگن میں دسمبر آئے گا

ہر ایک داستاں تجھ سے شروع ہوتی ہے

ہر ایک قصہ ترے نام پر تمام ہوا

ہماری سادہ مزاجی پہ رشک کرتے ہیں

وہ سادہ پوش جو بے انتہا رنگیلے ہیں

کسی کے واسطے جیتا ہے اب نہ مرتا ہے

ہر آدمی یہاں اپنا طواف کرتا ہے

یہ اور بات کہ اخترؔ حویلیاں نہ رہیں

کھنڈر میں کم تو نہیں اپنی آبرو روشن

پھر بھی ہم لوگ وہاں جیتے ہیں جینے کی طرح

موسم قہر جہاں ٹھہرا ہوا رہتا ہے