اپنی نگاہ پر بھی کروں اعتبار کیا

کس مان پر کہوں وہ مرا انتخاب تھا

کسی کے نرم لہجے کا قرینہ

مری آواز میں شامل رہا ہے

سمندر ہو تو اس میں ڈوب جانا بھی روا ہے

مگر دریاؤں کو تو پار کرنا چاہیئے تھا

اتنی بے ربط کہانی نہیں اچھی لگتی

اور واضح بھی اشارے نہیں اچھے لگتے

کیوں ڈھونڈنے نکلے ہیں نئے غم کا خزینہ

جب دل بھی وہی درد کی دولت بھی وہی ہے

رستے سے مری جنگ بھی جاری ہے ابھی تک

اور پاؤں تلے زخم کی وحشت بھی وہی ہے

اگر اتنی مقدم تھی ضرورت روشنی کی

تو پھر سائے سے اپنے پیار کرنا چاہیئے تھا

ایک دیوار اٹھائی تھی بڑی عجلت میں

وہی دیوار گرانے میں بہت دیر لگی

خوشی کے دور تو مہماں تھے آتے جاتے رہے

اداسی تھی کہ ہمیشہ ہمارے گھر میں رہی

اس عمارت کو گرا دو جو نظر آتی ہے

مرے اندر جو کھنڈر ہے اسے تعمیر کرو

جس سمت کی ہوا ہے اسی سمت چل پڑیں

جب کچھ نہ ہو سکا تو یہی فیصلہ کیا

پردہ آنکھوں سے ہٹانے میں بہت دیر لگی

ہمیں دنیا نظر آنے میں بہت دیر لگی

ذرا دھیمی ہو تو خوشبو بھی بھلی لگتی ہے

آنکھ کو رنگ بھی سارے نہیں اچھے لگتے

اس کے شکستہ وار کا بھی رکھ لیا بھرم

یہ قرض ہم نے زخم کی صورت ادا کیا

مری ہر بات پس منظر سے کیوں منسوب ہوتی ہے

مجھے آواز سی آتی ہے کیوں اجڑے دیاروں سے

ہمیں خبر تھی بچانے کا اس میں یارا نہیں

سو ہم بھی ڈوب گئے اور اسے پکارا نہیں

میں اب اس حرف سے کترا رہی ہوں

جو میری بات کا حاصل رہا ہے

مسلسل ایک ہی تصویر چشم تر میں رہی

چراغ بجھ بھی گیا روشنی سفر میں رہی

جو ڈبوئے گی نہ پہنچائے گی ساحل پہ ہمیں

اب وہی موج سمندر سے ابھرنے کو ہے