maiñ apne aap meñ taqsīm hone lagtā huuñ

use kaho ki mire sāmne na aayā kare

main apne aap mein taqsim hone lagta hun

use kaho ki mere samne na aaya kare

chhāoñ detā dhuup uThātā raste meñ

maiñ ne dekhā ek shajar darveshī meñ

chhaon deta dhup uThata raste mein

main ne dekha ek shajar darweshi mein

kisī ke saath milā huuñ baḌī mohabbat se

kabhī kabhār jo milte haiñ achchhe rahte haiñ

kisi ke sath mila hun baDi mohabbat se

kabhi kabhaar jo milte hain achchhe rahte hain

she'r kah kar kabhī dekho to khulegā tum par

itnā āsāñ nahīñ jitnā ye hunar lagtā hai

she'r kah kar kabhi dekho to khulega tum par

itna aasan nahin jitna ye hunar lagta hai

āḳhirī baar mulāqāt to kar lī hai magar

silsila apnī mohabbat kā kahāñ āḳhirī hai

aaKHiri bar mulaqat to kar li hai magar

silsila apni mohabbat ka kahan aaKHiri hai

kabhī kabhī to mirā ghar bhī mujh se pūchhtā hai

ki is jahāñ meñ koī terā ghar bhī hai ki nahīñ

kabhi kabhi to mera ghar bhi mujh se puchhta hai

ki is jahan mein koi tera ghar bhi hai ki nahin

rahtā huuñ maiñ jitnā saath sab ke

lagtā hai akelā ho gayā huuñ

rahta hun main jitna sath sab ke

lagta hai akela ho gaya hun

na.e ghar meñ har ik shai bhī na.ī hai

magar ḳhushbū usī kī aa rahī hai

nae ghar mein har ek shai bhi nai hai

magar KHushbu usi ki aa rahi hai

puurī ho jaatī agar koī kahānī hotī

ye mohabbat hai miyāñ is meñ kasak rahtī hai

puri ho jati agar koi kahani hoti

ye mohabbat hai miyan is mein kasak rahti hai

inhī jhuke hue peḌoñ se guftugū hai mirī

janāb mere buzurgoñ se guftugū hai mirī

inhi jhuke hue peDon se guftugu hai meri

janab mere buzurgon se guftugu hai meri

suḳhan ke āḳhirī dar par sadā lagātā huuñ

'zahūr' agle zamānoñ se guftugū hai mirī

suKHan ke aaKHiri dar par sada lagata hun

'zahur' agle zamanon se guftugu hai meri

shā'irī apnā lahū is liye detā huuñ tujhe

jāntā huuñ ki tū zinda mujhe kar saktī hai

sha'iri apna lahu is liye deta hun tujhe

jaanta hun ki tu zinda mujhe kar sakti hai

zindagī kitne salīqe se guzārā hai tujhe

muskurāte bhī rahe zaḳhm bhī khāte rahe ham

zindagi kitne saliqe se guzara hai tujhe

muskuraate bhi rahe zaKHm bhi khate rahe hum

hijr se vasl kī itnī thī masāfat yaaro

rang tabdīl huā bahte hue paanī kā

hijr se wasl ki itni thi masafat yaro

rang tabdil hua bahte hue pani ka

shahr ke chaurāhe meñ āñkheñ rakh dī haiñ

bach kar vo is baar kidhar se niklegā

shahr ke chaurahe mein aankhen rakh di hain

bach kar wo is bar kidhar se niklega

us kī palkoñ pe jo chamke the 'zahūr'

mere hāthoñ meñ vo taare TuuTe

us ki palkon pe jo chamke the 'zahur'

mere hathon mein wo tare TuTe

hameñ na dafn karo kachchī-pakkī qabroñ meñ

ham ahl-e-'ilm haiñ mar kar bhī jo nahīñ marte

hamein na dafn karo kachchi-pakki qabron mein

hum ahl-e-'ilm hain mar kar bhi jo nahin marte

maiñ roz daana nahīñ Dāltā parindoñ ko

ki bhuul jā.ūñ to vo chhat pe baiThe rahte haiñ

main roz dana nahin Dalta parindon ko

ki bhul jaun to wo chhat pe baiThe rahte hain