سب ستارے دلاسہ دیتے ہیں

چاند راتوں کو چیختا ہے بہت

کیا ضرورت ہے مجھ کو چہرے کی

کون چہرے سے جانتا ہے مجھے

عجیب خواب تھا آنکھوں میں نیند چھوڑ گیا

کہ نیند گزری ہے مجھ کو ذلیل کرتے ہوئے

جانے کس بات سے دکھا ہے بہت

دل کئی روز سے خفا ہے بہت

مرا ہوا میں وہ کردار ہوں کہانی کا

جو جی رہا ہے کہانی طویل کرتے ہوئے

میں بھی بکھرا ہوا ہوں اپنوں میں

وہ بھی تنہا سا اپنے گھر میں ہے

جب سے دیکھا ہے خواب میں اس کو

دل مسلسل کسی سفر میں ہے

مجھے پتہ ہے کہ رونے ث کچھ نہیں ہوتا

نیا سا دکھ ہے تو تھوڑا چھلک گیا ہوں میں

کیوں بتاتا نہیں کوئی کچھ بھی

آخر ایسا بھی کیا ہوا ہے مجھے

خودکشی جیسی کوئی بات نہیں

اک ذرا مجھ کو بد گمانی ہے

بجھتی آنکھوں میں ترے خواب کا بوسہ رکھا

رات پھر ہم نے اندھیروں میں اجالا رکھا

ایک پتہ ہوں شاخ سے بچھڑا

جانے بہہ کر میں کس دشا جاؤں

کیا قیامت ہے کہ تیری ہی طرح سے مجھ سے

زندگی نے بھی بہت دور کا رشتہ رکھا