کی تلاش کا نتیجه | موضو - نظم, صفحہ manush

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "manush"

نظم کے متعلقہ نتیجہ "manush"

نظم

دیار شرق کی آبادیوں کے اونچے ٹیلوں پر
کبھی آموں کے باغوں میں کبھی کھیتوں کی مینڈوں پر
کبھی جھیلوں کے پانی میں کبھی بستی کی گلیوں میں
کبھی کچھ نیم عریاں کم سنوں کی رنگ رلیوں میں
سحر دم جھٹپٹے کے وقت راتوں کے اندھیرے میں
کبھی میلوں میں ناٹک ٹولیوں میں ان کے ڈیرے میں
تعاقب میں کبھی گم تتلیوں کے سونی راہوں میں
کبھی ننھے پرندوں کی نہفتہ خواب گاہوں میں
برہنہ پاؤں جلتی ریت یخ بستہ ہواؤں میں
گریزاں بستیوں سے مدرسوں سے خانقاہوں میں
کبھی ہم سن حسینوں میں بہت خوش کام و دل رفتہ
کبھی پیچاں بگولہ ساں کبھی جیوں چشم خوں بستہ
ہوا میں تیرتا خوابوں میں بادل کی طرح اڑتا
پرندوں کی طرح شاخوں میں چھپ کر جھولتا مڑتا
مجھے اک لڑکا آوارہ منش آزاد سیلانی
مجھے اک لڑکا جیسے تند چشموں کا رواں پانی
نظر آتا ہے یوں لگتا ہے جیسے یہ بلائے جاں
مرا ہم زاد ہے ہر گام پر ہر موڑ پر جولاں
اسے ہم راہ پاتا ہوں یہ سائے کی طرح میرا
تعاقب کر رہا ہے جیسے میں مفرور ملزم ہوں
یہ مجھ سے پوچھتا ہے اخترالایمان تم ہی ہو

اختر الایمان

نظم

ایک بچہ کہ ابھی کچھ اسے تمییز نہ تھی
لہو و بازی سے پسندیدہ کوئی چیز نہ تھی
کھیلنا کودنا کھانا یہی معمول تھا بس
انہیں طفلانہ تمناؤں میں مشغول تھا بس
ایک تالاب تھا دو چار قدم گھر سے پرے
دل میں لہر آئی لب آب ذرا سیر کرے
صاف پانی سے جو تالاب کو پایا لبریز
کھیل کا شوق طبیعت میں ہوا اور بھی تیز
آس پاس اپنے جو پایا کوئی کنکر پتھر
پھینک مارا اسے پانی میں بہت خوش ہو کر
کھیل تھا پہلے تو اب طرفہ تماشا دیکھا
دل ہی دل میں متحیر تھا کہ یہ کیا دیکھا
دائرہ ایک بنا ایسا کہ بڑھتا ہے محیط
گھیر لی جس نے کہ تالاب کی سب سطح بسیط
پھر تو کھیل اس کا اسی شغل پہ موقوف رہا
اسی نظارے میں تا دیر وہ مصروف رہا
اسی اثنا میں ہوا بچے کی ماں کا بھی گزر
بولا اماں مجھے آئی ہے عجب چیز نظر
جو نہ دیکھی نہ سنی تھی کبھی اب سے پہلے
شاید آئی ہے نظر مجھ کو ہی سب سے پہلے
اک ذرا سی حرکت اور یہ تاثیر عجیب
دائرہ بڑھ کے پہنچتا ہے کنارے کے قریب
بسکہ جی جان سے اس شعبدے پر تھا شیدا
وسعت دائرہ کی اپنی عمل سے پیدا
تھی وہ ماں اہل دل اور نیک منش نیک نہاد
ہنس کے فرمایا مری جاں یہ نصیحت رکھ یاد
یوں ہی ہر کام کا ہو جاتا ہے انجام بڑا
گو کہ آغاز میں ہوتا نہیں وہ کام بڑا
کبھی ادنیٰ حرکت زلزلہ بن جاتی ہے
کبھی ناچیز سی اک بات غضب ڈھاتی ہے
یہی انداز نکوکاری و بد کاری ہے
اولاً خاص تھی اب عام میں وہ جاری ہے

اسماعیل میرٹھی

نظم

یشودھرا تھک کے سو گئی تھی
اور راہل بستر پر جاگتا تھا
مگر سدھارتھ
محل سے باہر نکل چکا تھا
اس کا ہردے بدل چکا تھا
بدن پہ گیروا لباس ڈالے
وہ سیدھا جنگل کو جا رہا تھا
یہ من ہی من وہ وچارتا تھا
یہ دھن یہ دولت
یہ عیش و عشرت
یہ پران کایا
یہ موہ مایا
ہے سب پرایا
کہیں نہیں شانتی کی چھایا
کہیں نہیں شانتی کی چھایا
پربھو یہ کیوں تو نے جگ بنایا
یہ جگ جہاں جگ جگانتر سے
اننت پرانی اسنکھ مانو
کامنا واسنا کی اگنی میں جل رہا ہے
وہ مرگ ترشنا کو جل سمجھ کر
خود آپ اپنے کو چھل رہا ہے
دکھوں کے صحرا میں چل رہا ہے
یہاں پہ جیون مرن بھی دکھ ہے
برہ بھی دکھ ہے ملن بھی دکھ ہے
شریر اور آتما بھی دکھ ہے
ترپتی اور ترشنا بھی دکھ ہے
مگر کہیں موکش کا کوئی راستہ نہیں ہے
کہیں بھی نروان کا کوئی سلسلہ نہیں ہے
میرے بھگوان
میں یگ کے اندھے وشال بن میں
کب سے نروان ڈھونڈھتا ہوں
منش کا کلیان ڈھونڈھتا ہوں
میں اپنی پہچان ڈھونڈھتا ہوں

رضا اشک

نظم

ہر آدمی کی قسمت میں
ایک نہ ایک سزا ہوتی ہے
میرے لیے ہر بار
تم سے دور رہنے کی سزا منتخب کی جائے گی
نا انصافی کے پیش نظر
سزا کا کام کسی منصف پر نہیں چھوڑا جائے گا
لیکن اس کے باوجود
وہ توہین کا وہ نوٹس نہیں جاری کر سکیں گے
جس میں وہی ہوں گے مدعی
وہی ہوں گے منصف
ہماری شہریت کو خام کر دیا گیا ہے
اچھا ہوا کہ ہمارے دلوں کو
آبگینے تراشنے والوں پر نہیں چھوڑا گیا
ایک آوارہ منش نے
مجھے چاک چلانا
اور مٹی میں دل رکھنا سکھایا
میں ہر رات اپنے دل کو
مٹی میں ملاتا اور نئی نئی طرح گوندھتا ہوں
ہر صبح اس ملک کے لیے
ایک نیا خواب ڈھالتا ہوں
جس کے لیے جغرافیے کی تاریخ میں
کوئی جگہ نہیں ہوگی
ابھی آسمانوں پر رہنے والوں کو
میرے جرائم کا علم نہیں ہوا
ورنہ وہ میرے سر پر
ایک آدھ آسمان ضرور گرا دیتے
احتیاطاً
میں نے
تمہیں ان ساری باتوں
اور اپنے خوابوں سے دور رکھا ہے
اسی لیے اب تک
کسی مصور یا مجسمہ ساز نے
تمہیں کوئی شکل نہیں دی
میں نے تمہیں ان خیالوں سے بھی دور رکھا ہے
جن تک کوئی شاعر رسائی حاصل کر سکے
یہاں تک کہ
میں نے تمہیں اپنی رسائی سے بھی دور رکھا ہے
تاکہ تمہارے وہ لباس آلودہ نہ ہوں
جنہیں پہن کر
تم آئینے کے سامنے نہیں جاتی ہوگی
جنہیں پہن کر
تم باغ کی سیر
اور بازار جانا بھی موقوف کر دیتی ہوگی
میں نے
اپنے لیے سزا تجویز کرنے کا اختیار
کسی کو نہیں دیا
تمہیں بھی نہیں
ورنہ تم میرے لیے قربت تجویز کر سکتی تھیں

انور سین رائے

نظم

گیان دھیان کے پیڑ کے نیچے
گوتم کی سی
آلتی پالتی مارے بیٹھا سوچ رہا ہوں
جگ کیا شے ہے
دکھ کیا ہے
جگ جیون کیا ہے
گوتم انیائے کا بیری
گوتم جو بھگوان بنا
گوتم جو بھوکا پیاسا تھا
جس کا پہلا گیان یہی تھا
بھوکا پیاسا کوئی منش بھی
کسی گیان کی تھاہ نہ پائے
گوتم راج محل کا پالا
جس کے سینکڑوں چاکر بھکشو
چھپے چھپائے
ہر پل اس کو دیکھ رہے تھے
پہلی تپسیا ختم ہوئی تو
سینکڑوں چاکر بھاگ کے پہنچے
گوتم اپنے چاکر بھکشو دیکھ کے خوش تھا
تازہ پھلوں کا رس پی کر پھر گیان دھیان میں ڈوب گیا
گیان دھیان کے پیڑ کے نیچے
گوتم کی سی
آلتی پالتی مارے بیٹھا سوچ رہا ہوں
پہلی تپسیا ختم ہوئی تو
کون سا چاکر کون سا بھکشو
پھل رس کی کچھ بوندیں دے گا
دوجی تپسیا کیسے ہوگی

منظور عارف

نظم

پہلی آواز غصیلی گرجتی
دیکھیو مت کھولیو اس وش بھرے موذی کا منہ
دیکھیو ان راستوں میں جل بجھے گی روشنی
آسماں کے جسم اودے جسم سے رسنے لگے گی پیپ بھی
دوسری آواز ڈرتے ہوئے سرگوشی
اس کی دھڑکن ہی سے چلتی ہے زماں کی نبض
پہلی آواز غصیلی گرجتی
اور تیری زباں چپ
زمہریری سانس اس کی عصر یخبندان لے آئے گی گیتی پر
مت کھولیو
مت کھولیو
دیکھنے کو میرا سینہ ہے دراصل اس کی کچھار
جس کی ڈھلوانوں کے دلدل لوتھڑے ہیں خون کے
جس پہ اگ آئیں ہیں خود رو جھاڑیاں کچھ سانس کی
گھات میں آ جائے گا اس پریت کے
باگھ کے سر سانپ کے دھڑ والا یہ عفریت
کھوب دے گا دانت گردن میں تری
دیکھیو مت کھولیو
مت کھولیو اس وش بھرے موذی کا منہ
اژدر کا منہ
اجگر کا منہ
افعی کا منہ
اس وش بھرے موذی کا منہ
یہ رگیں
دور تک پھیلی ہوئی
برزخ تلک پھیلی ہوئی جڑ
گڑ نہ جائیں تجھ میں بھی
یہ سرخ سانپ اس کینہ ور کی دم ہیں
کھا سکتی ہیں سب دنیا کا سبز
دیکھیو یہ بھوت آدم خور ہے
سانس لیتا ہر منش کھا جائے گا
مت کھولیو
مت کھولیو اس وش بھرے موذی کا منہ
اس خبیث آزاردہ کو مرنے دے
اس جھڑوس ایذا رساں کو مرنے دے
اس کے مر جانے میں انساں کا بھلا
اس کے مر جانے میں یزداں کا بھلا

رضی حیدر گیلانی

نظم

مجھ سے پہلی سی محبت مری محبوب نہ مانگ
میں نے سمجھا تھا کہ تو ہے تو درخشاں ہے حیات
تیرا غم ہے تو غم دہر کا جھگڑا کیا ہے
تیری صورت سے ہے عالم میں بہاروں کو ثبات
تیری آنکھوں کے سوا دنیا میں رکھا کیا ہے
تو جو مل جائے تو تقدیر نگوں ہو جائے
یوں نہ تھا میں نے فقط چاہا تھا یوں ہو جائے
اور بھی دکھ ہیں زمانے میں محبت کے سوا
راحتیں اور بھی ہیں وصل کی راحت کے سوا

فیض احمد فیض

نظم

بجھا جو روزن زنداں تو دل یہ سمجھا ہے
کہ تیری مانگ ستاروں سے بھر گئی ہوگی
چمک اٹھے ہیں سلاسل تو ہم نے جانا ہے
کہ اب سحر ترے رخ پر بکھر گئی ہوگی
غرض تصور شام و سحر میں جیتے ہیں
گرفت سایۂ دیوار و در میں جیتے ہیں

فیض احمد فیض

نظم

نام بھولے سے جو میرا کہیں آیا ہوگا
غیر محسوس طریقے سے وہ چونکا ہوگا
ایک جملے کو کئی بار سنایا ہوگا
بات کرتے ہوئے سو بار وہ بھولا ہوگا
یہ جو لڑکی نئی آئی ہے کہیں وہ تو نہیں
اس نے ہر چہرہ یہی سوچ کے دیکھا ہوگا
جان محفل ہے مگر آج فقط میرے بغیر
ہائے کس درجہ وہی بزم میں تنہا ہوگا
کبھی سناٹوں سے وحشت جو ہوئی ہوگی اسے
اس نے بے ساختہ پھر مجھ کو پکارا ہوگا
چلتے چلتے کوئی مانوس سی آہٹ پا کر
دوستوں کو بھی کس عذر سے روکا ہوگا
یاد کر کے مجھے نم ہو گئی ہوں گی پلکیں
''آنکھ میں پڑ گیا کچھ'' کہہ کے یہ ٹالا ہوگا
اور گھبرا کے کتابوں میں جو لی ہوگی پناہ
ہر سطر میں مرا چہرہ ابھر آیا ہوگا
جب ملی ہوگی اسے میری علالت کی خبر
اس نے آہستہ سے دیوار کو تھاما ہوگا
سوچ کر یہ کہ بہل جائے پریشانی دل
یوں ہی بے وجہ کسی شخص کو روکا ہوگا!

پروین شاکر

نظم

دنیا کی محفلوں سے اکتا گیا ہوں یا رب
کیا لطف انجمن کا جب دل ہی بجھ گیا ہو
شورش سے بھاگتا ہوں دل ڈھونڈتا ہے میرا
ایسا سکوت جس پر تقریر بھی فدا ہو
مرتا ہوں خامشی پر یہ آرزو ہے میری
دامن میں کوہ کے اک چھوٹا سا جھونپڑا ہو
آزاد فکر سے ہوں عزلت میں دن گزاروں
دنیا کے غم کا دل سے کانٹا نکل گیا ہو
لذت سرود کی ہو چڑیوں کے چہچہوں میں
چشمے کی شورشوں میں باجا سا بج رہا ہو
گل کی کلی چٹک کر پیغام دے کسی کا
ساغر ذرا سا گویا مجھ کو جہاں نما ہو
ہو ہاتھ کا سرہانا سبزے کا ہو بچھونا
شرمائے جس سے جلوت خلوت میں وہ ادا ہو
مانوس اس قدر ہو صورت سے میری بلبل
ننھے سے دل میں اس کے کھٹکا نہ کچھ مرا ہو
صف باندھے دونوں جانب بوٹے ہرے ہرے ہوں
ندی کا صاف پانی تصویر لے رہا ہو
ہو دل فریب ایسا کوہسار کا نظارہ
پانی بھی موج بن کر اٹھ اٹھ کے دیکھتا ہو
آغوش میں زمیں کی سویا ہوا ہو سبزہ
پھر پھر کے جھاڑیوں میں پانی چمک رہا ہو
پانی کو چھو رہی ہو جھک جھک کے گل کی ٹہنی
جیسے حسین کوئی آئینہ دیکھتا ہو
مہندی لگائے سورج جب شام کی دلہن کو
سرخی لیے سنہری ہر پھول کی قبا ہو
راتوں کو چلنے والے رہ جائیں تھک کے جس دم
امید ان کی میرا ٹوٹا ہوا دیا ہو
بجلی چمک کے ان کو کٹیا مری دکھا دے
جب آسماں پہ ہر سو بادل گھرا ہوا ہو
پچھلے پہر کی کوئل وہ صبح کی موذن
میں اس کا ہم نوا ہوں وہ میری ہم نوا ہو
کانوں پہ ہو نہ میرے دیر و حرم کا احساں
روزن ہی جھونپڑی کا مجھ کو سحر نما ہو
پھولوں کو آئے جس دم شبنم وضو کرانے
رونا مرا وضو ہو نالہ مری دعا ہو
اس خامشی میں جائیں اتنے بلند نالے
تاروں کے قافلے کو میری صدا درا ہو
ہر دردمند دل کو رونا مرا رلا دے
بے ہوش جو پڑے ہیں شاید انہیں جگا دے

علامہ اقبال

نظم

گر مجھے اس کا یقیں ہو مرے ہمدم مرے دوست
گر مجھے اس کا یقیں ہو کہ ترے دل کی تھکن
تری آنکھوں کی اداسی تیرے سینے کی جلن
میری دل جوئی مرے پیار سے مٹ جائے گی
گر مرا حرف تسلی وہ دوا ہو جس سے
جی اٹھے پھر ترا اجڑا ہوا بے نور دماغ
تیری پیشانی سے ڈھل جائیں یہ تذلیل کے داغ
تیری بیمار جوانی کو شفا ہو جائے
گر مجھے اس کا یقیں ہو مرے ہمدم مرے دوست
روز و شب شام و سحر میں تجھے بہلاتا رہوں
میں تجھے گیت سناتا رہوں ہلکے شیریں
آبشاروں کے بہاروں کے چمن زاروں کے گیت
آمد صبح کے، مہتاب کے، سیاروں کے گیت
تجھ سے میں حسن و محبت کی حکایات کہوں
کیسے مغرور حسیناؤں کے برفاب سے جسم
گرم ہاتھوں کی حرارت میں پگھل جاتے ہیں
کیسے اک چہرے کے ٹھہرے ہوئے مانوس نقوش
دیکھتے دیکھتے یک لخت بدل جاتے ہیں
کس طرح عارض محبوب کا شفاف بلور
یک بیک بادۂ احمر سے دہک جاتا ہے
کیسے گلچیں کے لیے جھکتی ہے خود شاخ گلاب
کس طرح رات کا ایوان مہک جاتا ہے
یونہی گاتا رہوں گاتا رہوں تیری خاطر
گیت بنتا رہوں بیٹھا رہوں تیری خاطر
پر مرے گیت ترے دکھ کا مداوا ہی نہیں
نغمہ جراح نہیں مونس و غم خوار سہی
گیت نشتر تو نہیں مرہم آزار سہی
تیرے آزار کا چارہ نہیں نشتر کے سوا
اور یہ سفاک مسیحا مرے قبضے میں نہیں
اس جہاں کے کسی ذی روح کے قبضے میں نہیں
ہاں مگر تیرے سوا تیرے سوا تیرے سوا

فیض احمد فیض

نظم

دل کی بے سود تڑپ جسم کی مایوس پکار
چند روز اور مری جان فقط چند ہی روز

فیض احمد فیض

نظم

ہر دم ابدی راحت کا سماں دکھلا کے ہمیں دلگیر نہ کر
للٰلہ حباب آب رواں پر نقش بقا تحریر نہ کر
مایوسی کے رمتے بادل پر امید کے گھر تعمیر نہ کر

اختر شیرانی

نظم

1
وہ صبح کبھی تو آئے گی
ان کالی صدیوں کے سر سے جب رات کا آنچل ڈھلکے گا
جب دکھ کے بادل پگھلیں گے جب سکھ کا ساگر چھلکے گا
جب امبر جھوم کے ناچے گا جب دھرتی نغمے گائے گی
وہ صبح کبھی تو آئے گی
جس صبح کی خاطر جگ جگ سے ہم سب مر مر کر جیتے ہیں
جس صبح کے امرت کی دھن میں ہم زہر کے پیالے پیتے ہیں
ان بھوکی پیاسی روحوں پر اک دن تو کرم فرمائے گی
وہ صبح کبھی تو آئے گی
مانا کہ ابھی تیرے میرے ارمانوں کی قیمت کچھ بھی نہیں
مٹی کا بھی ہے کچھ مول مگر انسانوں کی قیمت کچھ بھی نہیں
انسانوں کی عزت جب جھوٹے سکوں میں نہ تولی جائے گی
وہ صبح کبھی تو آئے گی
دولت کے لیے جب عورت کی عصمت کو نہ بیچا جائے گا
چاہت کو نہ کچلا جائے گا غیرت کو نہ بیچا جائے گا
اپنے کالے کرتوتوں پر جب یہ دنیا شرمائے گی
وو صبح کبھی تو آئے گی
بیتیں گے کبھی تو دن آخر یہ بھوک کے اور بیکاری کے
ٹوٹیں گے کبھی تو بت آخر دولت کی اجارہ داری کے
جب ایک انوکھی دنیا کی بنیاد اٹھائی جائے گی
وہ صبح کبھی تو آئے گی
مجبور بڑھاپا جب سونی راہوں کی دھول نہ پھانکے گا
معصوم لڑکپن جب گندی گلیوں میں بھیک نہ مانگے گا
حق مانگنے والوں کو جس دن سولی نہ دکھائی جائے گی
وہ صبح کبھی تو آئے گی
فاقوں کی چتاؤں پر جس دن انساں نہ جلائے جائیں گے
سینوں کے دہکتے دوزخ میں ارماں نہ جلائے جائیں گے
یہ نرک سے بھی گندی دنیا جب سورگ بنائی جائے گی
وہ صبح کبھی تو آئے گی
2
وہ صبح ہمیں سے آئے گی
جب دھرتی کروٹ بدلے گی جب قید سے قیدی چھوٹیں گے
جب پاپ گھروندے پھوٹیں گے جب ظلم کے بندھن ٹوٹیں گے
اس صبح کو ہم ہی لائیں گے وہ صبح ہمیں سے آئے گی
وہ صبح ہمیں سے آئے گی
منحوس سماجی ڈھانچوں میں جب ظلم نہ پالے جائیں گے
جب ہاتھ نہ کاٹے جائیں گے جب سر نہ اچھالے جائیں گے
جیلوں کے بنا جب دنیا کی سرکار چلائی جائے گی
وہ صبح ہمیں سے آئے گی
سنسار کے سارے محنت کش کھیتوں سے ملوں سے نکلیں گے
بے گھر بے در بے بس انساں تاریک بلوں سے نکلیں گے
دنیا امن اور خوشحالی کے پھولوں سے سجائی جائے گی
وہ صبح ہمیں سے آئے گی

ساحر لدھیانوی

نظم

تیرا الطاف و کرم ایک حقیقت ہے مگر
یہ حقیقت بھی حقیقت میں فسانہ ہی نہ ہو
تیری مانوس نگاہوں کا یہ محتاط پیام
دل کے خوں کرنے کا ایک اور بہانہ ہی نہ ہو

ساحر لدھیانوی

نظم

میں جو تمہارے ساتھ نہیں ہوں
دل کو مت مایوس کرو تم
تم ہو تنہا تم ہو اکیلے
ایسا کیوں محسوس کرو تم

جاں نثار اختر

نظم

وہ زندگی سے کہتا تھا
کہ تجھ کو میں سجاؤں گا
تو مجھ سے چاند مانگ لے
میں چاند لے کے آؤں گا

جاوید اختر

نظم

صبح صبح اک خواب کی دستک پر دروازہ کھولا' دیکھا
سرحد کے اس پار سے کچھ مہمان آئے ہیں
آنکھوں سے مانوس تھے سارے
چہرے سارے سنے سنائے
پاؤں دھوئے، ہاتھ دھلائے
آنگن میں آسن لگوائے
اور تنور پہ مکی کے کچھ موٹے موٹے روٹ پکائے
پوٹلی میں مہمان مرے
پچھلے سالوں کی فصلوں کا گڑ لائے تھے

گلزار

نظم

میں نے اس سے یہ کہا
یہ جو دس کروڑ ہیں
جہل کا نچوڑ ہیں
ان کی فکر سو گئی
ہر امید کی کرن
ظلمتوں میں کھو گئی
یہ خبر درست ہے
ان کی موت ہو گئی
بے شعور لوگ ہیں
زندگی کا روگ ہیں
اور تیرے پاس ہے
ان کے درد کی دوا
میں نے اس سے یہ کہا
تو خدا کا نور ہے
عقل ہے شعور ہے
قوم تیرے ساتھ ہے
تیرے ہی وجود سے
ملک کی نجات ہے
تو ہے مہر صبح نو
تیرے بعد رات ہے
بولتے جو چند ہیں
سب یہ شر پسند ہیں
ان کی کھینچ لے زباں
ان کا گھونٹ دے گلا
میں نے اس سے یہ کہا
جن کو تھا زباں پہ ناز
چپ ہیں وہ زباں دراز
چین ہے سماج میں
بے مثال فرق ہے
کل میں اور آج میں
اپنے خرچ پر ہیں قید
لوگ تیرے راج میں
آدمی ہے وہ بڑا
در پہ جو رہے پڑا
جو پناہ مانگ لے
اس کی بخش دے خطا

حبیب جالب

نظم

تم مجھ کو گڑیا کہتے ہو
ٹھیک ہی کہتے ہو!
کھیلنے والے سب ہاتھوں کو میں گڑیا ہی لگتی ہوں
جو پہنا دو مجھ پہ سجے گا
میرا کوئی رنگ نہیں
جس بچے کے ہاتھ تھما دو
میری کسی سے جنگ نہیں
سوچتی جاگتی آنکھیں میری
جب چاہے بینائی لے لو
کوک بھرو اور باتیں سن لو
یا میری گویائی لے لو
مانگ بھرو سیندور لگاؤ
پیار کرو آنکھوں میں بساؤ
اور پھر جب دل بھر جائے تو
دل سے اٹھا کے طاق پہ رکھ دو
تم مجھ کو گڑیا کہتے ہو
ٹھیک ہی کہتے ہو!

پروین شاکر

Load More

ریختہ فاؤنڈیشن کی دیگر ویب سائٹس

تلاش

URD

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

بولیے