Sher on Naaz

aa.ina dekh ke kahte haiñ sañvarne vaale

aaj be-maut mareñge mire marne vaale

aaina dekh ke kahte hain sanwarne wale

aaj be-maut marenge mere marne wale

'rehānī' un ko dekh ke mahv-e-ḳhirām-e-nāz

har gaam par bahār kā dhokā huā mujhe

'rehani' un ko dekh ke mahw-e-KHiram-e-naz

har gam par bahaar ka dhoka hua mujhe

ġhurūr-e-husn kā 'ālam to dekhiye 'rāhī'

kisī se baat bhī karnā hai nā-gavār unheñ

ghurur-e-husn ka 'alam to dekhiye 'rahi'

kisi se baat bhi karna hai na-gawar unhen

zarā dekh us ke naḳhre nahīñ khātī daal roTī

maiñ khilātā us ko sadqa jo yahāñ mazār hotā

zara dekh us ke naKHre nahin khati dal roTi

main khilata us ko sadqa jo yahan mazar hota

martā tirī kaj-adā.iyoñ par

lekin vo ḳhumār utar gayā hai

marta teri kaj-adaiyon par

lekin wo KHumar utar gaya hai

hashr tak be-gunahī naaz karegī mujh par

vo mirā terī nigāhoñ meñ burā ho jaanā

hashr tak be-gunahi naz karegi mujh par

wo mera teri nigahon mein bura ho jaana

zabt-e-ġham vufūr-e-shauq aur dil-e-nā-subūr-e-ishq

mujh ko to hai ġhurūr-e-ishq aap ko naaz ho na ho

zabt-e-gham wufur-e-shauq aur dil-e-na-subur-e-ishq

mujh ko to hai ghurur-e-ishq aap ko naz ho na ho

tumhārā lams mo.attar tumhārā jism bahār

yahī to bahs gulāboñ ke rū-ba-rū Thahrī

tumhaara lams moattar tumhaara jism bahaar

yahi to bahs gulabon ke ru-ba-ru Thahri

nāzukī qāmat-e-zebā kī bayāñ kyā kiije

pairahan bhī jahāñ uslūb-e-nazākat māñge

nazuki qamat-e-zeba ki bayan kya kije

pairahan bhi jahan uslub-e-nazakat mange