Sher on Sarhad

mohabbat kī to koī had, koī sarhad nahīñ hotī

hamāre darmiyāñ ye fāsle, kaise nikal aa.e

mohabbat ki to koi had, koi sarhad nahin hoti

hamare darmiyan ye fasle, kaise nikal aae

sarhadeñ achchhī ki sarhad pe na ruknā achchhā

sochiye aadmī achchhā ki parinda achchhā

sarhaden achchhi ki sarhad pe na rukna achchha

sochiye aadmi achchha ki parinda achchha

raushnī bāñTtā huuñ sarhadoñ ke paar bhī maiñ

ham-vatan is liye ġhaddār samajhte haiñ mujhe

raushni banTta hun sarhadon ke par bhi main

ham-watan is liye ghaddar samajhte hain mujhe

us mulk kī sarhad ko koī chhū nahīñ saktā

jis mulk kī sarhad kī nigahbān haiñ āñkheñ

us mulk ki sarhad ko koi chhu nahin sakta

jis mulk ki sarhad ki nigahban hain aankhen

jaise do mulkoñ ko ik sarhad alag kartī huī

vaqt ne ḳhat aisā khīñchā mere us ke darmiyāñ

jaise do mulkon ko ek sarhad alag karti hui

waqt ne KHat aisa khincha mere us ke darmiyan

hamārā ḳhuun kā rishta hai sarhadoñ kā nahīñ

hamāre ḳhuun meñ gañgā bhī chanāb bhī hai

hamara KHun ka rishta hai sarhadon ka nahin

hamare KHun mein ganga bhi chanab bhi hai

sarhadeñ rok na pā.eñgī kabhī rishtoñ ko

ḳhushbūoñ par na kabhī koī bhī pahrā niklā

sarhaden rok na paengi kabhi rishton ko

KHushbuon par na kabhi koi bhi pahra nikla

zamīñ ko ai ḳhudā vo zalzala de

nishāñ tak sarhadoñ ke jo miTā de

zamin ko ai KHuda wo zalzala de

nishan tak sarhadon ke jo miTa de

shahr-e-lahore se kuchh duur nahīñ hai dehlī

ek sarhad hai kisī vaqt bhī miT saktī hai

shahr-e-lahore se kuchh dur nahin hai dehli

ek sarhad hai kisi waqt bhi miT sakti hai

diloñ ke biich na dīvār hai na sarhad hai

dikhā.ī dete haiñ sab fāsle nazar ke mujhe

dilon ke bich na diwar hai na sarhad hai

dikhai dete hain sab fasle nazar ke mujhe