ustaadon ka ustaad hai ustaad hamara: Meer sahab ki tareef mein

reḳhte ke tumhīñ ustād nahīñ ho 'ġhālib'

kahte haiñ agle zamāne meñ koī 'mīr' bhī thā

reKHte ke tumhin ustad nahin ho 'ghaalib'

kahte hain agle zamane mein koi 'mir' bhi tha

āshiqī meñ 'mīr' jaise ḳhvāb mat dekhā karo

bāvle ho jāoge mahtāb mat dekhā karo

aashiqi mein 'mir' jaise KHwab mat dekha karo

bawle ho jaoge mahtab mat dekha karo

shāgird haiñ ham 'mīr' se ustād ke 'rāsiḳh'

ustādoñ kā ustād hai ustād hamārā

shagird hain hum 'mir' se ustad ke 'rasiKH'

ustadon ka ustad hai ustad hamara

ishq bin jiine ke ādāb nahīñ aate haiñ

'mīr' sāhab ne kahā hai ki miyāñ ishq karo

ishq bin jine ke aadab nahin aate hain

'mir' sahab ne kaha hai ki miyan ishq karo

'mīr' kā rañg baratnā nahīñ āsāñ ai 'dāġh'

apne dīvāñ se milā dekhiye dīvāñ un kā

'mir' ka rang baratna nahin aasan ai 'dagh'

apne diwan se mila dekhiye diwan un ka

sher mere bhī haiñ pur-dard va-lekin 'hasrat'

'mīr' kā sheva-e-guftār kahāñ se lā.ūñ

sher mere bhi hain pur-dard wa-lekin 'hasrat'

'mir' ka shewa-e-guftar kahan se laun

'saudā' tū is ġhazal ko ġhazal-dar-ġhazal hī kah

honā hai tujh ko 'mīr' se ustād kī taraf

'sauda' tu is ghazal ko ghazal-dar-ghazal hi kah

hona hai tujh ko 'mir' se ustad ki taraf

guzre bahut ustād magar rañg-e-asar meñ

be-misl hai 'hasrat' suḳhan-e-'mīr' abhī tak

guzre bahut ustad magar rang-e-asar mein

be-misl hai 'hasrat' suKHan-e-'mir' abhi tak

'hālī' suḳhan meñ 'sheftā' se mustafīd hai

'ġhālib' kā mo'taqid hai muqallid hai 'mīr' kā

'haali' suKHan mein 'shefta' se mustafid hai

'ghaalib' ka mo'taqid hai muqallid hai 'mir' ka

ab ḳhudā maġhfirat kare us kī

'mīr' marhūm thā ajab koī

ab KHuda maghfirat kare us ki

'mir' marhum tha ajab koi

go ki tū 'mīr' se huā behtar

'mus.hafī' phir bhī 'mīr' 'mīr' hī hai

go ki tu 'mir' se hua behtar

'mushafi' phir bhi 'mir' 'mir' hi hai

'dāġh' ke sher javānī meñ bhale lagte haiñ

'mīr' kī koī ġhazal gaao ki kuchh chain paḌe

'dagh' ke sher jawani mein bhale lagte hain

'mir' ki koi ghazal gao ki kuchh chain paDe

shubh 'nāsiḳh' nahīñ kuchh 'mīr' kī ustādī meñ

aap be-bahra hai jo mo'taqid-e-'mīr' nahīñ

shubh 'nasiKH' nahin kuchh 'mir' ki ustadi mein

aap be-bahra hai jo mo'taqid-e-'mir' nahin

maiñ huuñ kyā chiiz jo us tarz pe jā.ūñ 'akbar'

'nāsiḳh' o 'zauq' bhī jab chal na sake 'mīr' ke saath

main hun kya chiz jo us tarz pe jaun 'akbar'

'nasiKH' o 'zauq' bhi jab chal na sake 'mir' ke sath

saḳht mushkil thā imtihān-e-ġhazal

'mīr' kī naql kar ke paas hue

saKHt mushkil tha imtihan-e-ghazal

'mir' ki naql kar ke pas hue

'iqbāl' kī navā se musharraf hai go 'na.īm'

urdu ke sar pe 'mīr' kī ġhazloñ kā taaj hai

'iqbaal' ki nawa se musharraf hai go 'naim'

urdu ke sar pe 'mir' ki ghazlon ka taj hai

jab bhī TuuTā mire ḳhvāboñ kā hasīñ tāj-mahal

maiñ ne ghabrā ke kahī 'mīr' ke lahje meñ ġhazal

jab bhi TuTa mere KHwabon ka hasin taj-mahal

main ne ghabra ke kahi 'mir' ke lahje mein ghazal

tumhārī yaad bhī chupke se aa ke baiTh ga.ī

ġhazal jo 'mīr' kī ik gungunā rahā thā maiñ

tumhaari yaad bhi chupke se aa ke baiTh gai

ghazal jo 'mir' ki ek gunguna raha tha main

kal shaam chhat pe mīr-taqī-'mīr' kī ġhazal

maiñ gungunā rahī thī ki tum yaad aa ga.e

kal sham chhat pe mir-taqi-'mir' ki ghazal

main gunguna rahi thi ki tum yaad aa gae

suno maiñ 'mīr' kā dīvān samajhtā huuñ use

jo namāzī haiñ vo qur.ān samajhte hoñge

suno main 'mir' ka diwan samajhta hun use

jo namazi hain wo quran samajhte honge