اس نے چلتے چلتے لفظوں کا زہراب

میرے جذبوں کی پیالی میں ڈال دیا

وہ اجنبی تری بانہوں میں جو رہا شب بھر

کسے خبر کہ وہ دن بھر کہاں رہا ہوگا

پھٹے پرانے بدن سے کسے خرید سکوں

سجے ہیں کانچ کے پیکر بڑی دکانوں میں

کچھ مدھر تانیں فضا میں تھرتھرا کر رہ گئیں

دھان کے کھیتوں میں چنچل پنچھیوں کا شور تھا

پھر اک نئے سفر پہ چلا ہوں مکان سے

کوئی پکارتا ہے مجھے آسمان سے

پان کے ٹھیلے ہوٹل لوگوں کا جمگھٹ

اپنے تنہا ہونے کا احساس بھی کیا

اپنی ہی ذات کے صحرا میں سلگتے ہوئے لوگ

اپنی پرچھائیں سے ٹکرائے ہیولوں سے ملے

پتھر نے پکارا تھا میں آواز کی دھن میں

موجوں کی طرح چاروں طرف پھیل گیا ہوں

وہ سو رہا ہے خدا دور آسمانوں میں

فرشتے لوریاں گاتے ہیں اس کے کانوں میں

دیکھ رہا تھا جاتے جاتے حسرت سے

سوچ رہا ہوگا میں اس کو روکوں گا

آواز دے رہا ہے اکیلا خدا مجھے

میں اس کو سن رہا ہوں ہواؤں کے کان سے

میں تیری چاہ میں جھوٹا ہوس میں سچا ہوں

برا سمجھ لے مگر دوسروں سے اچھا ہوں

میں بھی تالاب کا ٹھہرا ہوا پانی تھا کبھی

ایک پتھر نے رواں دھار کیا ہے مجھ کو