اپنی باتوں کے زمانے تو ہوا برد ہوئے

اب کیا کرتے ہیں ہم صورت حالات پہ بات

تو جب سامنے ہوتا ہے

اور کہیں ہوتا ہوں میں

باصرؔ تمہیں یہاں کا ابھی تجربہ نہیں

بیمار ہو؟ پڑے رہو، مر بھی گئے تو کیا

ختم ہوئیں ساری باتیں

اچھا اب چلتا ہوں میں

چمکی تھی ایک برق سی پھولوں کے آس پاس

پھر کیا ہوا چمن میں مجھے کچھ خبر نہیں

کیسے یاد رہی تجھ کو

میری اک چھوٹی سی بھول

جب بھی ملے ہم ان سے انہوں نے یہی کہا

بس آج آنے والے تھے ہم آپ کی طرف

رک گیا ہاتھ ترا کیوں باصرؔ

کوئی کانٹا تو نہ تھا پھولوں میں

گلا بھی تجھ سے بہت ہے مگر محبت بھی

وہ بات اپنی جگہ ہے یہ بات اپنی جگہ

موجب رنگ چمن خون شہیداں نکلا

موت کی جیب سے بھی زیست کا ساماں نکلا

بڑھ گئی تجھ سے مل کے تنہائی

روح جویائے ہم سبو تھی بہت

تیرے دیے ہوئے دکھ

تیرے نام کریں گے

اب دل کو سمجھائے کون

بات اگرچہ ہے معقول

کچھ تو حساس ہم زیادہ ہیں

کچھ وہ برہم زیادہ ہوتا ہے

دل لگا لیتے ہیں اہل دل وطن کوئی بھی ہو

پھول کو کھلنے سے مطلب ہے چمن کوئی بھی ہو