غضنفر کی شاعری

ہمارے ہاتھ سے وہ بھی نکل گیا آخر

کہ جس خیال میں ہم مدتوں سے کھوئے تھے

رفتہ رفتہ آنکھوں کو حیرانی دے کر جائے گا

خوابوں کا یہ شوق ہمیں ویرانی دے کر جائے گا

دفتر میں ذہن گھر پہ نگہ راستے میں پاؤں

جینے کی کاوشوں میں بدن ہاتھ سے گیا

ہر ایک رات کہیں دور بھاگ جاتا ہوں

ہر ایک صبح کوئی مجھ کو کھینچ لاتا ہے

نہ جانے کس طرح بستر میں گھس کر بیٹھ جاتی ہیں

وہ آوازیں جنہیں ہم روز باہر چھوڑ آتے ہیں

بچ کے دنیا سے گھر چلے آئے

گھر سے بچنے مگر کدھر جائیں

میں اس کے جھوٹ کو بھی سچ سمجھ کے سنتا ہوں

کہ اس کے جھوٹ میں بھی زندگی کی قوت ہے

میں ایسا نرم طبیعت کبھی نہ تھا پہلے

ضرور لمس کوئی اس کا چھو گیا مجھ کو

ہم کہ ساحل کے تصور سے سہم جاتے ہیں

لوگ کس طرح سمندر میں اترتے ہوں گے

تمہارے ہوتے ہوئے لوگ کیوں بھٹکتے ہیں

کہیں پہ خضر نظر آئے تو سوال کروں

کل تک جو شفاف تھے چہرے آوازوں سے خالی تھے

آڑی ترچھی سرخ لکیریں ان پر بھی اب دیکھو گے

ذہن کے خانوں میں جانے وقت نے کیا بھر دیا

بے سبب ہونے لگی اک ایک سے ان بن مری

عجیب بات ہمارا ہی خوں ہوا پانی

ہمیں نے آگ میں اپنے بدن بھگوئے تھے

غضنفر