وہ لمحہ جب مرے بچے نے ماں پکارا مجھے

میں ایک شاخ سے کتنا گھنا درخت ہوئی

روشندان سے دھوپ کا ٹکڑا آ کر میرے پاس گرا

اور پھر سورج نے کوشش کی مجھ سے آنکھ ملانے کی

ہم اور تم جو بدل گئے تو اتنی حیرت کیا

عکس بدلتے رہتے ہیں آئینوں کی خاطر

لوگو! ہم پردیسی ہو کر جانے کیا کیا کھو بیٹھے

اپنے کوچے بھی لگتے ہیں بیگانے بیگانے سے

کنکر پھینک رہے ہیں یہ اندازہ کرنے کو

ٹھہرا پانی کتنی حمیراؔ ہلچل رکھتا ہے

عجب مذاق اس کا تھا کہ سر سے پاؤں تک مجھے

وفاؤں سے بھگو دیا ندامتوں کی سوچ میں

مری المایوں میں قیمتی سامان کافی تھا

مگر اچھا لگا اس سے کئی فرمائشیں کرنا

ہوا کی تیز گامیوں کا انکشاف کیا کریں

جو دوش پر لیے ہو اس کے بر خلاف کیا کریں

گذشتہ موسموں میں بجھ گئے ہیں رنگ پھولوں کے

دریچہ اب بھی میرا روشنی کے زاویوں پر ہے