دل آباد کہاں رہ پائے اس کی یاد بھلا دینے سے

کمرہ ویراں ہو جاتا ہے اک تصویر ہٹا دینے سے

راستہ سوچتے رہنے سے کدھر بنتا ہے

سر میں سودا ہو تو دیوار میں در بنتا ہے

دل پہ کچھ اور گزرتی ہے مگر کیا کیجے

لفظ کچھ اور ہی اظہار کئے جاتے ہیں

یہ شہر طلسمات ہے کچھ کہہ نہیں سکتے

پہلو میں کھڑا شخص فرشتہ کہ بلا ہے

اپنے دیئے کو چاند بتانے کے واسطے

بستی کا ہر چراغ بجھانا پڑا ہمیں

دنیا تو ہے دنیا کہ وہ دشمن ہے سدا کی

سو بار ترے عشق میں ہم خود سے لڑے ہیں

کیا کیا دلوں کا خوف چھپانا پڑا ہمیں

خود ڈر گئے تو سب کو ڈرانا پڑا ہمیں

عالی شعر ہو یا افسانہ یا چاہت کا تانا بانا

لطف ادھورا رہ جاتا ہے پوری بات بتا دینے سے

تو زندگی کو جئیں کیوں نہ زندگی کی طرح

کہیں پہ پھول کہیں پر شرر بناتے ہوئے

تمہارا کیا تمہیں آساں بہت رستے بدلنا ہے

ہمیں ہر ایک موسم قافلے کے ساتھ چلنا ہے

راستہ آگے بھی لے جاتا نہیں

لوٹ کر جانا بھی مشکل ہو گیا

اسے دل سے بھلا دینا ضروری ہو گیا ہے

یہ جھگڑا ہی مٹا دینا ضروری ہو گیا ہے

وقت دیتا ہے جو پہچان تو یہ دیکھتا ہے

کس نے کس درد میں دل کی خوشی رکھی ہوئی ہے

ذرا سی بات پر صید غبار یاس ہونا

ہمیں برباد کر دے گا بہت حساس ہونا

پیار وہ پیڑ ہے سو بار اکھاڑو دل سے

پھر بھی سینے میں کوئی داب سلامت رہ جائے

عشق خود سکھاتا ہے ساری حکمتیں عالؔی

نقد دل کسے دینا بار سر کہاں رکھنا

غرور عشق میں اک انکسار فقر بھی ہے

خمیدہ سر ہیں وفا کو علم بناتے ہوئے

برگ بھر بار محبت کا اٹھایا کب تھا

تم نے سینے میں کوئی درد بسایا کب تھا

جاں کھپاتے ہیں غم عشق میں خوش خوش عالؔی

کیسی لذت کا یہ آزار بنایا ہوا ہے

ہم کہ ہیں نقش سر ریگ رواں کیا جانے

کب کوئی موج ہوا اپنا نشاں لے جائے