کوئی ہلچل ہے نہ آہٹ نہ صدا ہے کوئی

دل کی دہلیز پہ چپ چاپ کھڑا ہے کوئی

سحر کے ساتھ چلے روشنی کے ساتھ چلے

تمام عمر کسی اجنبی کے ساتھ چلے

یاد ماضی کی پراسرار حسیں گلیوں میں

میرے ہم راہ ابھی گھوم رہا ہے کوئی

بڑے دلچسپ وعدے تھے بڑے رنگین دھوکے تھے

گلوں کی آرزو میں زندگی شعلے اٹھا لائی

یادوں کے درختوں کی حسیں چھاؤں میں جیسے

آتا ہے کوئی شخص بہت دور سے چل کے

نہ انتظار نہ آہیں نہ بھیگتی راتیں

خبر نہ تھی کہ تجھے اس طرح بھلا دوں گا

کچھ دور آؤ موت کے ہم راہ بھی چلیں

ممکن ہے راستے میں کہیں زندگی ملے

سلام تیری مروت کو مہربانی کو

ملا اک اور نیا سلسلہ کہانی کو

چمکتے خواب ملتے ہیں مہکتے پیار ملتے ہیں

تمہارے شہر میں کتنے حسیں آزار ملتے ہیں

اے انتظار صبح تمنا یہ کیا ہوا

آتا ہے اب خیال بھی تیرا تھکا ہوا

وفا کی پیار کی غم کی کہانیاں لکھ کر

سحر کے ہاتھ میں دل کی کتاب دیتا ہوں

پہچان بھی سکی نہ مری زندگی مجھے

اتنی روا روی میں کہیں سامنا ہوا

جلاؤ غم کے دئے پیار کی نگاہوں میں

کہ تیرگی ہے بہت زندگی کی راہوں میں

تری نگاہ مداوا نہ بن سکی جن کا

تری تلاش میں ایسے بھی زخم کھائے ہیں

زندگانی کے حسیں شہر میں آ کر جامیؔ

زندگانی سے کہیں ہاتھ ملائے بھی نہیں