ہزار رخ ترے ملنے کے ہیں نہ ملنے میں

کسے فراق کہوں اور کسے وصال کہوں

اردو جسے کہتے ہیں تہذیب کا چشمہ ہے

وہ شخص مہذب ہے جس کو یہ زباں آئی

وہ شخص اپنی جگہ ہے مرقع تہذیب

یہ اور بات ہے کہ قاتل اسی کا نام بھی ہے

تلخئ زندگی ارے توبہ

زہر میں زہر کا مزا نہ ملا

دل گوارا نہیں کرتا ہے شکست امید

ہر تغافل پہ نوازش کا گماں ہوتا ہے

عشق خود اپنی جگہ مظہر انوار خدا

عقل اس سوچ میں گم کس کو خدا کہتے ہیں

سخت جان لیوا ہے سادگی محبت کی

زہر کی کسوٹی پر زندگی کو کستی ہے

زندگی محو خود آرائی تھی

آنکھ اٹھا کر بھی نہ دیکھا ہم نے

لڑکھڑانا بھی ہے تکمیل سفر کی تمہید

ہم کو منزل کا نشاں لغزش پیہم سے ملا

اب اس سے کیا غرض یہ حرم ہے کہ دیر ہے

بیٹھے ہیں ہم تو سایۂ دیوار دیکھ کر

ہزار حسن دل آرائے دو جہاں ہوتا

نصیب عشق نہ ہوتا تو رائیگاں ہوتا

درد آلودۂ درماں تھا روشؔ

درد کو درد بنایا ہم نے

کوہ سنگین حقائق تھا جہاں

حسن کا خواب تراشا ہم نے

وہ کہاں درد جو دل میں ترے محدود رہا

درد وہ ہے جو دل کون و مکاں تک پہنچے

نقاب شب میں چھپ کر کس کی یاد آئی سمجھتے ہیں

اشارے ہم ترے اے شمع تنہائی سمجھتے ہیں

بتان شہر کو یہ اعتراف ہو کہ نہ ہو

زبان عشق کی سب گفتگو سمجھتے ہیں

جو راہ اہل خرد کے لیے ہے لا محدود

جنون عشق میں وہ چند گام ہوتی ہے

خون دل صرف کر رہا ہوں روشؔ

خوب سے نقش خوب تر کے لیے