اگر شعور نہ ہو تو بہشت ہے دنیا

بڑے عذاب میں گزری ہے آگہی کے ساتھ

میرے سخن کی داد بھی اس کو ہی دیجئے

وہ جس کی آرزو مجھے شاعر بنا گئی

ہمیں خبر ہے زن فاحشہ ہے یہ دنیا

سو ہم بھی ساتھ اسے بے نکاح رکھتے ہیں

تم نے کہا تھا چپ رہنا سو چپ نے بھی کیا کام کیا

چپ رہنے کی عادت نے کچھ اور ہمیں بد نام کیا

ثبوت مانگ رہے ہیں مری تباہی کا

مجھے تباہ کیا جن کی کج ادائی نے

مری تنہائیوں کو کون سمجھے

میں سایہ ہوں مگر خود سے جدا ہوں

صہباؔ صاحب دریا ہو تو دریا جیسی بات کرو

تیز ہوا سے لہر تو اک جوہڑ میں بھی آ جاتی ہے

دل کے اجڑے نگر کو کر آباد

اس ڈگر کو بھی کوئی راہی دے

شاید وہ سنگ دل ہو کبھی مائل کرم

صورت نہ دے یقین کی اس احتمال کو

میں اسے سمجھوں نہ سمجھوں دل کو ہوتا ہے ضرور

لالہ و گل پر گماں اک اجنبی تحریر کا

بیان لغزش آدم نہ کر کہ وہ فتنہ

مری زمیں سے نہیں تیرے آسماں سے اٹھا