بچھڑ کے تجھ سے نہ دیکھا گیا کسی کا ملاپ

اڑا دیئے ہیں پرندے شجر پہ بیٹھے ہوئے

اک کھلونا ٹوٹ جائے گا نیا مل جائے گا

میں نہیں تو کوئی تجھ کو دوسرا مل جائے گا

مرے ہم راہ گرچہ دور تک لوگوں کی رونق ہے

مگر جیسے کوئی کم ہے کبھی ملنے چلے آؤ

پرندہ جانب دانہ ہمیشہ اڑ کے آتا ہے

پرندے کی طرف اڑ کر کبھی دانہ نہیں آتا

کٹی ہوئی ہے زمیں کوہ سے سمندر تک

ملا ہے گھاؤ یہ دریا کو راستہ دے کر

وہ جو ترک ربط کا عہد تھا کہیں ٹوٹنے تو نہیں لگا

ترے دل کے درد کو دیکھ کر مرے دل میں درد ہے کس لئے

جو مہ و سال گزارے ہیں بچھڑ کر ہم نے

وہ مہ و سال اگر ساتھ گزارے ہوتے

ماہ اچھا ہے بہت ہی نہ یہ سال اچھا ہے

پھر بھی ہر ایک سے کہتا ہوں کہ حال اچھا ہے

صدائیں ایک سی یکسانیت میں ڈوب جاتی ہیں

ذرا سا مختلف جس نے پکارا یاد رہتا ہے

ہوا ہے جو سدا اس کو نصیبوں کا لکھا سمجھا

عدیمؔ اپنے کیے پر مجھ کو پچھتانا نہیں آتا

بڑا ویران موسم ہے کبھی ملنے چلے آؤ

ہر اک جانب ترا غم ہے کبھی ملنے چلے آؤ

وہ کہ خوشبو کی طرح پھیلا تھا میرے چار سو

میں اسے محسوس کر سکتا تھا چھو سکتا نہ تھا

یاد کر کے اور بھی تکلیف ہوتی تھی عدیمؔ

بھول جانے کے سوا اب کوئی بھی چارا نہ تھا

میں دریا ہوں مگر بہتا ہوں میں کہسار کی جانب

مجھے دنیا کی پستی میں اتر جانا نہیں آتا

فاصلے ایسے بھی ہوں گے یہ کبھی سوچا نہ تھا

سامنے بیٹھا تھا میرے اور وہ میرا نہ تھا

ہم بہر حال دل و جاں سے تمہارے ہوتے

تم بھی اک آدھ گھڑی کاش ہمارے ہوتے

شور سا ایک ہر اک سمت بپا لگتا ہے

وہ خموشی ہے کہ لمحہ بھی صدا لگتا ہے

کیوں پرکھتے ہو سوالوں سے جوابوں کو عدیمؔ

ہونٹ اچھے ہوں تو سمجھو کہ سوال اچھا ہے

بکتا تو نہیں ہوں نہ مرے دام بہت ہیں

رستے میں پڑا ہوں کہ اٹھا کوئی آ کر