tumheñ jafā se na yuuñ baaz aanā chāhiye thā

abhī kuchh aur mirā dil dukhānā chāhiye thā

tumhein jafa se na yun baz aana chahiye tha

abhi kuchh aur mera dil dukhana chahiye tha

shahr talab kare agar tum se ilāj-e-tīragī

sāhab-e-iḳhtiyār ho aag lagā diyā karo

shahr talab kare agar tum se ilaj-e-tiragi

sahab-e-iKHtiyar ho aag laga diya karo

us kī ḳhvāhish hai ki ab log na ro.eñ na hañseñ

be-hisī vaqt kī āvāz banā dī jaa.e

us ki KHwahish hai ki ab log na roen na hansen

be-hisi waqt ki aawaz bana di jae

ik sazā aur asīroñ ko sunā dī jaa.e

ya.anī ab jurm-e-asīrī kī sazā dī jaa.e

ek saza aur asiron ko suna di jae

yani ab jurm-e-asiri ki saza di jae

ġham se bahal rahe haiñ aap aap bahut ajiib haiñ

dard meñ Dhal rahe haiñ aap aap bahut ajiib haiñ

gham se bahal rahe hain aap aap bahut ajib hain

dard mein Dhal rahe hain aap aap bahut ajib hain

ḳhuun se jab jalā diyā ek diyā bujhā huā

phir mujhe de diyā gayā ek diyā bujhā huā

KHun se jab jala diya ek diya bujha hua

phir mujhe de diya gaya ek diya bujha hua