دیکھے جو میری نیکی کو شک کی نگاہ سے

وہ آدمی بھی تو مرے اندر ہے کیا کروں

اپنی عادت کہ سب سے سب کہہ دیں

شہر کا ہے مزاج سناٹا

وہ ایک خواب جو پھر لوٹ کر نہیں آیا

وہ اک خیال جسے میں بھلا نہیں سکتا

کوئی شے ایک سی نہیں رہتی

عمر ڈھلتی ہے غم بدلتے ہیں

جو بات چھپائی ہے سب سے وو ان سے چھپانی مشکل ہے

باہر کی کہانی آساں ہے اندر کی کہانی مشکل ہے

ایسا نہیں کہ ان سے محبت نہ ہو مگر

پہلے سا جوش پہلے سی شدت نہیں رہی

خالی برآمدوں نے مجھے دیکھ کر کہا

کیا بات ہے اداس سے کچھ لگ رہے ہو تم

جینا عذاب کیوں ہے یہ کیا ہو گیا مجھے

کس شخص کی لگی ہے بھلا بد دعا مجھے

یہ تمنا ہے کہ اب اور تمنا نہ کریں

شعر کہتے رہیں چپ چاپ تقاضا نہ کریں

ہزار چاہیں مگر چھوٹ ہی نہیں سکتی

بڑی عجیب ہے یہ مےکشی کی عادت بھی

کچھ تو میں بھی ڈرا ڈرا سا تھا

اور کچھ راستا نیا سا تھا

زندگی ہم سے تو اس درجہ تغافل نہ برت

ہم بھی شامل تھے ترے چاہنے والوں میں کبھی

یہ الگ بات کہ وہ مجھ سے خفا رہتا ہے

میں اک انسان ہوں اور مجھ میں خدا رہتا ہے

جب یہ مانا کہ دل میں ڈر ہے بہت

تب کہیں جا کے دل سے ڈر نکلا

بت سمجھتے تھے جس کو سارے لوگ

وہ مرے واسطے خدا سا تھا

ہم جو پہلے کہیں ملے ہوتے

اور ہی اپنے سلسلے ہوتے

جھانکتے رات کے گریباں سے

ہم نے سو آفتاب دیکھے ہیں

اک وہی شخص مجھ کو یاد رہا

جس کو سمجھا تھا بھول جاؤں گا

جس سے سارے چراغ جلتے تھے

وہ چراغ آج کچھ بجھا سا تھا

کچھ تو اپنے لئے بھی رکھنا ہے

زخم اوروں کو کیوں دکھائیں سب

گفتگو تیر سی لگی دل میں

اب ہے شاید علاج سناٹا

وہ بھی ہمارے نام سے بیگانے ہو گئے

ہم کو بھی سچ ہے ان سے محبت نہیں رہی

نکلے تھے دونوں بھیس بدل کے تو کیا عجب

میں ڈھونڈتا خدا کو پھرا اور خدا مجھے

جھوٹی امید کی انگلی کو پکڑنا چھوڑو

درد سے بات کرو درد سے لڑنا چھوڑو

کیسے ہو کیا ہے حال مت پوچھو

مجھ سے مشکل سوال مت پوچھو

زندگی اس قدر کٹھن کیوں ہے

آدمی کی بھلا خطا کیا ہے

کیا نہیں جانتا مجھے کوئی

کیا نہیں شہر میں وہ گھر باقی

چاند سورج کی طرح تم بھی ہو قدرت کا کھیل

جیسے ہو ویسے رہو بننا بگڑنا چھوڑو

مجھے خبر نہ تھی اس گھر میں کتنے کمرے ہیں

میں کیسے لے کے وہاں ساری داستاں جاتا