فلک پر اڑتے جاتے بادلوں کو دیکھتا ہوں میں

ہوا کہتی ہے مجھ سے یہ تماشا کیسا لگتا ہے

دن گزرتے ہیں گزرتے ہی چلے جاتے ہیں

ایک لمحہ جو کسی طرح گزرتا ہی نہیں

لوٹ گئے سب سوچ کے گھر میں کوئی نہیں ہے

اور یہ ہم کہ اندھیرا کر کے بیٹھ گئے ہیں

اترے تھے میدان میں سب کچھ ٹھیک کریں گے

سب کچھ الٹا سیدھا کر کے بیٹھ گئے ہیں

لوگوں نے بہت چاہا اپنا سا بنا ڈالیں

پر ہم نے کہ اپنے کو انسان بہت رکھا

یہ قید ہے تو رہائی بھی اب ضروری ہے

کسی بھی سمت کوئی راستہ ملے تو سہی

پاؤں رکتے ہی نہیں ذہن ٹھہرتا ہی نہیں

کوئی نشہ ہے تھکن کا کہ اترتا ہی نہیں

دور بستی پہ ہے دھواں کب سے

کیا جلا ہے جسے بجھاتے نہیں

ایک مشعل تھی بجھا دی اس نے

پھر اندھیروں کو ہوا دی اس نے

برستے تھے بادل دھواں پھیلتا تھا عجب چار جانب

فضا کھل اٹھی تو سراپا تمہارا بہت یاد آیا

زوال جسم کو دیکھو تو کچھ احساس ہو اس کا

بکھرتا ذرہ ذرہ کوئی صحرا کیسا لگتا ہے

دم بہ دم مجھ پہ چلا کر تلوار

ایک پتھر کو جلا دی اس نے