falak par uḌte jaate bādaloñ ko dekhtā huuñ maiñ

havā kahtī hai mujh se ye tamāshā kaisā lagtā hai

falak par uDte jate baadalon ko dekhta hun main

hawa kahti hai mujh se ye tamasha kaisa lagta hai

din guzarte haiñ guzarte hī chale jaate haiñ

ek lamha jo kisī tarah guzartā hī nahīñ

din guzarte hain guzarte hi chale jate hain

ek lamha jo kisi tarah guzarta hi nahin

lauT ga.e sab soch ke ghar meñ koī nahīñ hai

aur ye ham ki añdherā kar ke baiTh ga.e haiñ

lauT gae sab soch ke ghar mein koi nahin hai

aur ye hum ki andhera kar ke baiTh gae hain

utre the maidān meñ sab kuchh Thiik kareñge

sab kuchh ulTā sīdhā kar ke baiTh ga.e haiñ

utre the maidan mein sab kuchh Thik karenge

sab kuchh ulTa sidha kar ke baiTh gae hain

logoñ ne bahut chāhā apnā sā banā Dāleñ

par ham ne ki apne ko insān bahut rakkhā

logon ne bahut chaha apna sa bana Dalen

par hum ne ki apne ko insan bahut rakkha

ye qaid hai to rihā.ī bhī ab zarūrī hai

kisī bhī samt koī rāsta mile to sahī

ye qaid hai to rihai bhi ab zaruri hai

kisi bhi samt koi rasta mile to sahi

paañv rukte hī nahīñ zehn Thahartā hī nahīñ

koī nashsha hai thakan kā ki utartā hī nahīñ

panw rukte hi nahin zehn Thaharta hi nahin

koi nashsha hai thakan ka ki utarta hi nahin

duur bastī pe hai dhuāñ kab se

kyā jalā hai jise bujhāte nahīñ

dur basti pe hai dhuan kab se

kya jala hai jise bujhate nahin

ek mish.al thī bujhā dī us ne

phir andheroñ ko havā dī us ne

ek mishal thi bujha di us ne

phir andheron ko hawa di us ne

baraste the bādal dhuāñ phailtā thā ajab chaar jānib

fazā khil uThī to sarāpā tumhārā bahut yaad aayā

baraste the baadal dhuan phailta tha ajab chaar jaanib

faza khil uThi to sarapa tumhaara bahut yaad aaya

zavāl-e-jism ko dekho to kuchh ehsās ho is kā

bikhartā zarra zarra koī sahrā kaisā lagtā hai

zawal-e-jism ko dekho to kuchh ehsas ho is ka

bikharta zarra zarra koi sahra kaisa lagta hai

dam-ba-dam mujh pe chalā kar talvār

ek patthar ko jilā dī us ne

dam-ba-dam mujh pe chala kar talwar

ek patthar ko jila di us ne