ham faqīroñ kā pairahan hai dhuup

aur ye raat apnī chādar hai

hum faqiron ka pairahan hai dhup

aur ye raat apni chadar hai

tire hāthoñ meñ hai tirī qismat

tirī izzat tire hī kaam se hai

tere hathon mein hai teri qismat

teri izzat tere hi kaam se hai

maiñ bārishoñ meñ bahut bhīgtā rahā 'ābid'

sulagtī dhuup meñ ik chhat bahut zarūrī hai

main barishon mein bahut bhigta raha 'abid'

sulagti dhup mein ek chhat bahut zaruri hai

ab qafas aur gulistāñ meñ koī farq nahīñ

ham ko ḳhushbū kī talab hai ye sabā jāntī hai

ab qafas aur gulistan mein koi farq nahin

hum ko KHushbu ki talab hai ye saba jaanti hai

is e'tibār pe kaaTī hai ham ne umr-e-azīz

sahar kā vaqt ujāle bhī saath lā.egā

is e'tibar pe kaTi hai hum ne umr-e-aziz

sahar ka waqt ujale bhi sath laega

sab apne apne tarīqe se bhiik māñgte haiñ

koī ba-nām-e-mohabbat koī ba-jāma-e-ishq

sab apne apne tariqe se bhik mangte hain

koi ba-nam-e-mohabbat koi ba-jama-e-ishq

koī manzar bhī nahīñ achchhā lagā

ab ke ā.ankhoñ meñ hai vīrānī bahut

koi manzar bhi nahin achchha laga

ab ke aaankhon mein hai virani bahut

yazīd-e-vaqt ne ab ke lagā.ī hai qadġhan

ki bhuul kar bhī na gaa.e koī tarāna-e-ishq

yazid-e-waqt ne ab ke lagai hai qadghan

ki bhul kar bhi na gae koi tarana-e-ishq

sar par gire makān kā malba hī rakh liyā

duniyā ke qīmtī sar-o-sāmān se ga.e

sar par gire makan ka malba hi rakh liya

duniya ke qimti sar-o-saman se gae

ham kisī sultāñ ke taabe nahīñ 'ābid-vadūd'

ham vo kahte haiñ jo apne dil pe hai guzrī huī

hum kisi sultan ke tabe nahin 'abid-wadud'

hum wo kahte hain jo apne dil pe hai guzri hui

shahr ye sāyoñ kā hai is meñ banī-ādam kahāñ

ab kisī sūrat yahāñ insān honā chāhiye

shahr ye sayon ka hai is mein bani-adam kahan

ab kisi surat yahan insan hona chahiye

magar ye tīrgī jaane kā naam letī nahīñ

maiñ nuur bāñTtā soz-e-nihāñ kī zad meñ huuñ

magar ye tirgi jaane ka nam leti nahin

main nur banTta soz-e-nihan ki zad mein hun