مجھ کو معلوم ہے محبوب پرستی کا عذاب

دیر سے چاند نکلنا بھی غلط لگتا ہے

تجھ سے بچھڑوں تو تری ذات کا حصہ ہو جاؤں

جس سے مرتا ہوں اسی زہر سے اچھا ہو جاؤں

تم مرے ساتھ ہو یہ سچ تو نہیں ہے لیکن

میں اگر جھوٹ نہ بولوں تو اکیلا ہو جاؤں

اس قدر آپ کے بدلے ہوئے تیور ہیں کہ میں

اپنی ہی چیز اٹھاتے ہوئے ڈر جاتا ہوں

میں اس لئے بھی ترے فن کی قدر کرتا ہوں

تو جھوٹ بول کے آنسو نکال لیتا ہے

ایک ہی تیر ہے ترکش میں تو عجلت نہ کرو

ایسے موقعے پہ نشانا بھی غلط لگتا ہے

وہ اپنے حسن کی خیرات دینے والے ہیں

تمام جسم کو کاسہ بنا کے چلنا ہے

تمہارے وصل کا جس دن کوئی امکان ہوتا ہے

میں اس دن روزہ رکھتا ہوں برائی چھوڑ دیتا ہوں

رفاقتوں کا توازن اگر بگڑ جائے

خموشیوں کے تعاون سے گھر چلا لینا

جو کھو گیا ہے کہیں زندگی کے میلے میں

کبھی کبھی اسے آنسو نکل کے دیکھتے ہیں

میں نے اس شہر میں وہ ٹھوکریں کھائی ہیں کہ اب

آنکھ بھی موند کے گزروں تو گزر جاتا ہوں

مری عادت مجھے پاگل نہیں ہونے دیتی

لوگ تو اب بھی سمجھتے ہیں کہ گھر جاتا ہوں

نہ جانے کیا خرابی آ گئی ہے میرے لہجے میں

نہ جانے کیوں مری آواز بوجھل ہوتی رہتی ہے

خدایا یوں بھی ہو کہ اس کے ہاتھوں قتل ہو جاؤں

وہی اک ایسا قاتل ہے جو پیشہ ور نہیں لگتا

میں قصیدہ ترا لکھوں تو کوئی بات نہیں

پر کوئی دوسرا دہرائے تو شک کرتا ہوں

تنہائی سے بچاؤ کی صورت نہیں کروں

مر جاؤں کیا کسی سے محبت نہیں کروں

محبت تیر ہے اور تیر باطن چھید دیتا ہے

مگر نیت غلط ہو تو نشانے پر نہیں لگتا

اگر کٹ پھٹ گیا تھا میرا دامن

تمہیں سینہ پرونا چاہئے تھا

آگ تو چاروں ہی جانب تھی پر اچھا یہ ہے

ہوشمندی سے کسی چیز کو جلنے نہ دیا