دل کشی تھی انسیت تھی یا محبت یا جنون

سب مراحل تجھ سے جو منسوب تھے اچھے لگے

نئی نسلوں کے ہاتھوں میں بھی تابندہ رہے گا

میں مل جاؤں گا مٹی میں قلم زندہ رہے گا

حسن کی دل کشی پہ ناز نہ کر

آئنے بد نظر بھی ہوتے ہیں

پیار کا دونوں پہ آخر جرم ثابت ہو گیا

یہ فرشتے آج جنت سے نکالے جائیں گے

واعظ سفر تو میرا بھی تھا روح کی طرف

پر کیا کروں کہ راہ میں یہ جسم آ پڑا

دھاوا بولے گا بہت جلد خزاں کا لشکر

شاخ کو نیزہ کروں پھول کو تلوار کروں

مجھ کو جنت کے نظارے بھی نہیں جچتے ہیں

شہر جاناں ہی تصور میں بسا ہے صاحب

سن رہا ہوں کہ وہ آئیں گے ہنسانے مجھ کو

آنسوؤ تم بھی ذرا رنگ جمائے رکھنا

یوں نبھاتا ہوں میں رشتہ آلوکؔ

بے گناہی کی سزا ہو جیسے

حد امکان سے آگے میں جانا چاہتا ہوں پر

ابھی ایمان آدھا ہے ابھی لغزش ادھوری ہے

مرے لیے ہیں مصیبت یہ آئنہ خانے

یہاں ضمیر مرا بے نقاب رہتا ہے

ایک عمر سے تجھے میں بے عذر پی رہا ہوں

تو بھی تو پیاس میری اے جام پی لیا کر