میں نے چاہا تھا زخم بھر جائیں

زخم ہی زخم بھر گئے مجھ میں

ایک ہی بات مجھ میں اچھی ہے

اور میں بس وہی نہیں کرتا

میں نے تصویر پھینک دی ہے مگر

کیل دیوار میں گڑی ہوئی ہے

ایک درویش کو تری خاطر

ساری بستی سے عشق ہو گیا ہے

اس نے ناسور کر لیا ہوگا

زخم کو شاعری بناتے ہوئے

یہ جو میں ہوں ذرا سا باقی ہوں

وہ جو تم تھے وہ مر گئے مجھ میں

ہاتھ جس کو لگا نہیں سکتا

اس کو آواز تو لگانے دو

میں آئینوں کو دیکھے جا رہا تھا

اب ان سے بات بھی کرنے لگا ہوں

خود ہی جانے لگے تھے اور خود ہی

راستہ روک کر کھڑے ہوئے ہیں

کیسے کیسے بنا دیئے چہرے

اپنی بے چہرگی بناتے ہوئے

اور کتنی گھماؤ گے دنیا

ہم تو سر تھام کر کھڑے ہوئے ہیں

کیسا مجھ کو بنا دیا عمارؔ

کون سا رنگ بھر گئے مجھ میں