maiñ ne chāhā thā zaḳhm bhar jaa.eñ

zaḳhm hī zaḳhm bhar ga.e mujh meñ

main ne chaha tha zaKHm bhar jaen

zaKHm hi zaKHm bhar gae mujh mein

ek hī baat mujh meñ achchhī hai

aur maiñ bas vahī nahīñ kartā

ek hi baat mujh mein achchhi hai

aur main bas wahi nahin karta

ek darvesh ko tirī ḳhātir

saarī bastī se ishq ho gayā hai

ek darwesh ko teri KHatir

sari basti se ishq ho gaya hai

maiñ ne tasvīr pheñk dī hai magar

kiil dīvār meñ gaḌī huī hai

main ne taswir phenk di hai magar

kil diwar mein gaDi hui hai

ye jo maiñ huuñ zarā sā baaqī huuñ

vo jo tum the vo mar ga.e mujh meñ

ye jo main hun zara sa baqi hun

wo jo tum the wo mar gae mujh mein

haath jis ko lagā nahīñ saktā

us ko āvāz to lagāne do

hath jis ko laga nahin sakta

us ko aawaz to lagane do

us ne nāsūr kar liyā hogā

zaḳhm ko shā.erī banāte hue

us ne nasur kar liya hoga

zaKHm ko shaeri banate hue

maiñ ā.īnoñ ko dekhe jā rahā thā

ab in se baat bhī karne lagā huuñ

main aainon ko dekhe ja raha tha

ab in se baat bhi karne laga hun

ḳhud hī jaane lage the aur ḳhud hī

rāsta rok kar khaḌe hue haiñ

KHud hi jaane lage the aur KHud hi

rasta rok kar khaDe hue hain

aur kitnī ghumāoge duniyā

ham to sar thaam kar khaḌe hue haiñ

aur kitni ghumaoge duniya

hum to sar tham kar khaDe hue hain

kaise kaise banā diye chehre

apnī be-chehragī banāte hue

kaise kaise bana diye chehre

apni be-chehragi banate hue

kaisā mujh ko banā diyā 'ammār'

kaun sā rañg bhar ga.e mujh meñ

kaisa mujh ko bana diya 'ammar'

kaun sa rang bhar gae mujh mein