کوئی تہمت ہو مرے نام چلی آتی ہے

جیسے بازار میں ہر گھر سے گلی آتی ہے

کہاں ملا میں تجھے یہ سوال بعد کا ہے

تو پہلے یاد تو کر کس جگہ گنوایا مجھے

اندھیری رات ہے سایہ تو ہو نہیں سکتا

یہ کون ہے جو مرے ساتھ ساتھ چلتا ہے

مرے مزار پہ آ کر دیے جلائے گا

وہ میرے بعد مری زندگی میں آئے گا

کچھ تصاویر بول پڑتی ہیں

سب کی سب بے زباں نہیں ہوتیں

بعض وعدے کیے نہیں جاتے

پھر بھی ان کو نبھایا جاتا ہے

اذاں پہ قید نہیں بندش نماز نہیں

ہمارے پاس تو ہجرت کا بھی جواز نہیں

شب کو اک بار کھل کے روتا ہوں

پھر بڑے سکھ کی نیند سوتا ہوں

مجھے کچھ دیر رکنا چاہئے تھا

وہ شاید دیکھ ہی لیتا پلٹ کر

اس نام کا کوئی بھی نہیں ہے

جس نام سے ہم پکارتے ہیں

جاں قرض ہے سو اتارتے ہیں

ہم عمر کہاں گزارتے ہیں

عمر بھر جنگل میں رہ سکتا ہوں میں

اس میں گھر جیسی فضا موجود ہے

مجھے ہنسی بھی مرے حال پر نہیں آتی

وہ خود بھی روئے گا اوروں کو بھی رلائے گا

آنکھ جھپکیں تو اتنے عرصے میں

جانے کتنے برس گزر جائیں

جب تک میں پہنچتا ہوں کڑی دھوپ میں چل کر

دیوار کا سایہ پس دیوار نہ ہو جائے