shahr kī galiyoñ aur saḌkoñ par phirte haiñ māyūsī meñ

kaash koī 'anvar' se pūchhe aise be-ghar kitne haiñ

shahr ki galiyon aur saDkon par phirte hain mayusi mein

kash koi 'anwar' se puchhe aise be-ghar kitne hain

sach ye hai ham hī mohabbat kā sabaq paḌh na sake

varna an-paḌh to na the ham ko paḌhāne vaale

sach ye hai hum hi mohabbat ka sabaq paDh na sake

warna an-paDh to na the hum ko paDhane wale

husn aisā ki zamāne meñ nahīñ jis kī misāl

aur jamāl aisā ki DhūñDā kare har ḳhvāb-o-ḳhayāl

husn aisa ki zamane mein nahin jis ki misal

aur jamal aisa ki DhunDa kare har KHwab-o-KHayal

tumhāre dil meñ koī aur bhī hai mere sivā

gumān to hai zarā sā magar yaqīn nahīñ

tumhaare dil mein koi aur bhi hai mere siwa

guman to hai zara sa magar yaqin nahin

hai taqāzā-e-tahzīb 'anvar'

mat kaho vo ki jo muñh meñ aa.e

hai taqaza-e-tahzib 'anwar'

mat kaho wo ki jo munh mein aae

kaisā maqām aayā mohabbat kī raah meñ

dil ro rahā hai merā magar aañkh tar nahīñ

kaisa maqam aaya mohabbat ki rah mein

dil ro raha hai mera magar aankh tar nahin

dāman pe to har ek ke chhīTeñ haiñ ḳhuun kī

ab kis se pūchhiye ki gunahgār kaun hai

daman pe to har ek ke chhiTen hain KHun ki

ab kis se puchhiye ki gunahgar kaun hai

ham fitratan insāñ haiñ farishte to nahīñ haiñ

da.avā ye kareñ kaise ki laġhzish nahīñ karte

hum fitratan insan hain farishte to nahin hain

dawa ye karen kaise ki laghzish nahin karte

bahut āsān hai mushtarka diloñ meñ tafrīq

baat to jab hai ki bichhḌoñ ko milāyā jaa.e

bahut aasan hai mushtarka dilon mein tafriq

baat to jab hai ki bichhDon ko milaya jae

roz uTh jaatī hai ghar meñ koī dīvār na.ī

is tarah tañg huā jaatā hai āñgan apnā

roz uTh jati hai ghar mein koi diwar nai

is tarah tang hua jata hai aangan apna

ham se vafā-shi.ār ko bhī tere rū-ba-rū

khānī paḌī vafā kī qasam tere shahr meñ

hum se wafa-shiar ko bhi tere ru-ba-ru

khani paDi wafa ki qasam tere shahr mein