mirī zabān ke mausam badalte rahte haiñ

maiñ aadmī huuñ mirā e'tibār mat karnā

meri zaban ke mausam badalte rahte hain

main aadmi hun mera e'tibar mat karna

ḳhushk rut meñ is jagah ham ne banāyā thā makān

ye nahīñ mālūm thā ye rāsta paanī kā hai

KHushk rut mein is jagah hum ne banaya tha makan

ye nahin malum tha ye rasta pani ka hai

log kahte haiñ ki vo shaḳhs hai ḳhushbū jaisā

saath shāyad use le aa.e havā dekhte haiñ

log kahte hain ki wo shaKHs hai KHushbu jaisa

sath shayad use le aae hawa dekhte hain

badal gayā hai zamāna badal ga.ī duniyā

na ab vo maiñ huuñ mirī jaañ na ab vo tū tū hai

badal gaya hai zamana badal gai duniya

na ab wo main hun meri jaan na ab wo tu tu hai

sīkhā na duāoñ meñ qanā.at kā salīqa

vo maañg rahā huuñ jo muqaddar meñ nahīñ hai

sikha na duaon mein qanaat ka saliqa

wo mang raha hun jo muqaddar mein nahin hai

tirī zamīn pe kartā rahā huuñ mazdūrī

hai sūkhne ko pasīna muāvza hai kahāñ

teri zamin pe karta raha hun mazduri

hai sukhne ko pasina muawza hai kahan

hoñToñ ko phuul aañkh ko baada nahīñ kahā

tujhko tirī adā se ziyāda nahīñ kahā

honTon ko phul aankh ko baada nahin kaha

tujhko teri ada se ziyaada nahin kaha

tū mire paas jab nahīñ hotā

tujh se kartā huuñ kis qadar bāteñ

tu mere pas jab nahin hota

tujh se karta hun kis qadar baaten

kisī bhī kaam meñ lagtā nahīñ hai dil merā

baḌe dinoñ se tabī.at bujhī bujhī sī hai

kisi bhi kaam mein lagta nahin hai dil mera

baDe dinon se tabiat bujhi bujhi si hai

tumhāre saath mire muḳhtalif marāsim haiñ

mirī vafā pe kabhī inhisār mat karnā

tumhaare sath mere muKHtalif marasim hain

meri wafa pe kabhi inhisar mat karna

intihā.ī hasīn lagtī hai

jab vo kartī hai ruuTh kar bāteñ

intihai hasin lagti hai

jab wo karti hai ruTh kar baaten

ye ham-safar to sabhī ajnabī se lagte haiñ

maiñ jis ke saath chalā thā vo qāfila hai kahāñ

ye ham-safar to sabhi ajnabi se lagte hain

main jis ke sath chala tha wo qafila hai kahan

ab yahī sochte rahte haiñ bichhaḌ kar tujh se

shāyad aise nahīñ hotā agar aisā karte

ab yahi sochte rahte hain bichhaD kar tujh se

shayad aise nahin hota agar aisa karte

ajiib shor machāne lage haiñ sannāTe

ye kis tarah kī ḳhamoshī har ik sadā meñ hai

ajib shor machane lage hain sannaTe

ye kis tarah ki KHamoshi har ek sada mein hai

maiñ inhimāk meñ ye kis maqām tak pahuñchā

tujhe hī bhuul gayā tujh ko yaad karte hue

main inhimak mein ye kis maqam tak pahuncha

tujhe hi bhul gaya tujh ko yaad karte hue

nahīñ vo sham-e-mohabbat rahī to phir 'āsim'

ye kis duā se mire ghar meñ raushnī sī hai

nahin wo sham-e-mohabbat rahi to phir 'asim'

ye kis dua se mere ghar mein raushni si hai

tum is raste meñ kyuuñ bārūd bo.e jā rahe ho

kisī din is taraf se ḳhud guzarnā paḌ gayā to

tum is raste mein kyun barud boe ja rahe ho

kisi din is taraf se KHud guzarna paD gaya to

vaqt be-vaqt jhalaktā hai mirī sūrat se

kaun chehra mirī tashkīl meñ aayā huā hai

waqt be-waqt jhalakta hai meri surat se

kaun chehra meri tashkil mein aaya hua hai

ġhalat-ravī ko tirī maiñ ġhalat samajhtā huuñ

ye bevafā.ī bhī shāmil mirī vafā meñ hai

ghalat-rawi ko teri main ghalat samajhta hun

ye bewafai bhi shamil meri wafa mein hai

zāviya dhuup ne kuchh aisā banāyā hai ki ham

saa.e ko jism kī jumbish se judā dekhte haiñ

zawiya dhup ne kuchh aisa banaya hai ki hum

sae ko jism ki jumbish se juda dekhte hain

kuchh vo bhī tabī.at kā sukhī aisā nahīñ hai

kuchh ham bhī mohabbat meñ qanā.at nahīñ karte

kuchh wo bhi tabiat ka sukhi aisa nahin hai

kuchh hum bhi mohabbat mein qanaat nahin karte

ham apne baaġh ke phūloñ ko noch Dālte haiñ

jab iḳhtilāf koī bāġhbāñ se hotā hai

hum apne bagh ke phulon ko noch Dalte hain

jab iKHtilaf koi baghban se hota hai

tez itnā hī agar chalnā hai tanhā jaao tum

baat puurī bhī na hogī aur ghar aa jā.egā

tez itna hi agar chalna hai tanha jao tum

baat puri bhi na hogi aur ghar aa jaega

banā rakhā hai mansūba ka.ī barsoñ kā tū ne

agar ik din achānak tujhko marnā paḌ gayā to

bana rakha hai mansuba kai barson ka tu ne

agar ek din achanak tujhko marna paD gaya to

kahīñ kahīñ to zamīñ āsmāñ se ūñchī hai

ye raaz mujh pe khulā sīḌhiyāñ utarte hue

kahin kahin to zamin aasman se unchi hai

ye raaz mujh pe khula siDhiyan utarte hue

hai ye ummīd mire ḳhvāb meñ aap ā.eñge

ek dar aañkh kā rakhtā huuñ khulā raat ke vaqt

hai ye ummid mere KHwab mein aap aaenge

ek dar aankh ka rakhta hun khula raat ke waqt

mujhe ḳhabar hī nahīñ thī ki ishq kā āġhāz

ab ibtidā se nahīñ darmiyāñ se hotā hai

mujhe KHabar hi nahin thi ki ishq ka aaghaz

ab ibtida se nahin darmiyan se hota hai