زور قسمت پہ چل نہیں سکتا

خامشی اختیار کرتا ہوں

اس نے سن کر بات میری ٹال دی

الجھنوں میں اور الجھن ڈال دی

گن رہا ہوں حرف ان کے عہد کے

مجھ کو دھوکا دے رہی ہے یاد کیا

دل ٹھکانے ہو تو سب کچھ ہے عزیز

جی بہل جاتا ہے صحرا کیوں نہ ہو

حسن ہے داد خدا عشق ہے امداد خدا

غیر کا دخل نہیں بخت ہے اپنا اپنا

دنیا کی روش دیکھی تری زلف دوتا میں

بنتی ہے یہ مشکل سے بگڑتی ہے ذرا میں

عیاں یا نہاں اک نظر دیکھ لیتے

کسی صورت ان کو مگر دیکھ لیتے

مشکل ہے امتیاز عذاب و ثواب میں

پیتا ہوں میں شراب ملا کر گلاب میں

شیشے کھلے نہیں ابھی ساغر چلے نہیں

اڑنے لگی پری کی طرح بو شراب کی

بہت کچھ دیکھنا ہے آگے آگے

ابھی دل نے مرے دیکھا ہی کیا ہے

ہم کو سنبھالتا کوئی کیا راہ عشق میں

کھا کھا کے ٹھوکریں ہمیں آخر سنبھل گئے

درد سہنے کے لئے صدمے اٹھانے کے لئے

ان سے دل اپنا مجھے واپس طلب کرنا پڑا

آنکھوں میں تری شکل ہے دل میں ہے تری یاد

آئے بھی تو کس شان سے فرقت کے دن آئے

دیکھتا ہوں ان کی صورت دیکھ کر

دھوپ میں تارے نظر آتے ہیں مجھے

ابھی کچھ ہے ابھی کچھ ہے ابھی کچھ

تری کافر نظر کیا جانے کیا ہے

آرام اپنے بس کا ہے بس میں نہیں ہے کیا

گلشن میں کیا دھرا ہے قفس میں نہیں ہے کیا

صحبت غیر سے بچئے بچئے

دیکھیے دیکھیے رسوائی ہے

وہ یہ کہہ کر داغ دیتے ہیں مجھے

پھول سے پہلے ثمر آتے نہیں

نالے ہیں نہ آہیں ہیں نہ رونا نہ تڑپنا

بے خود ہوں تری یاد میں فرصت کے دن آئے

دھڑکتے ہوئے دل کے ہمراہ میرے

مری نبض بھی چارہ گر دیکھ لیتے

کوئی رسوا کوئی سودائی ہے

اک جہاں آپ کا شیدائی ہے

وہ سنیں یا نہ سنیں نالہ و فریاد عزیزؔ

آپ ہرگز نہ کریں ترک تقاضا اپنا

وہ ابر گھرا جھوم کے رحمت کے دن آئے

پینے کے پلانے کے مسرت کے دن آئے

نسریں میں یہ مہک ہے نہ یہ نسترن میں ہے

بوئے گل مراد ترے پیرہن میں ہے

دم تکلم کسی کے آگے ہم اپنے دل کو بھی دیتے ہوکے

ملاتے چن چن کے لفظ ایسے سوال گویا جواب ہوتا