کچرے سے اٹھائی جو کسی طفل نے روٹی

پھر حلق سے میرے کوئی لقمہ نہیں اترا

جب وصل کا آئے گا ترے ساتھ صنم دن

اس دن کو حقیقت میں کہوں گا میں جنم دن

اس سے بڑھ کر اور کیا ہم پر ستم ہوگا منیرؔ

مشورہ مانگا ہے اس نے فیصلہ کرنے کے بعد

کنج حیرت سے چلے دشت زیاں تک لائے

کون لا سکتا ہے ہم دل کو جہاں تک لائے

کوئی بھی سر میں نہیں ہے منیرؔ کیا کیجے

یہ زندگی کا ترانہ ریاض مانگتا ہے

پڑ جاتے ہیں کتنے چھالے ہاتھوں میں

آتے ہیں پھر چند نوالے ہاتھوں میں

بوڑھے کمزور والدین کے ساتھ

جی رہا ہوں میں کتنے چین کے ساتھ

چراغ اندر کی سازشوں سے بجھے ہوئے ہیں

اور اس کا الزام بھی ہوا پر چلا گیا ہے

کیا خبر کون سا رستہ تری جانب نکلے

بے ارادہ بھی کئی بار سفر کرتے ہیں

میں آج تجھ سے ملاقات کرنے آیا ہوں

نئی غزل کی شروعات کرنے آیا ہوں

سپہ سالار کے جب ہاتھ کانپیں تو سپاہی بھی

زیادہ دیر پھر میدان میں ٹھہرا نہیں کرتے

مسکرا کر اگر وہ دیکھے تو

آئنے پر نشان پڑ جائے

زمیں پہ صرف اتارا نہیں منیرؔ اس نے

پھر اس کے بعد ہمارا خیال بھی رکھا

ایک امید کے سہارے پر

کتنی تاخیر دیکھ لیتے ہیں

کرنی پڑ جائے وضاحت پہ وضاحت لیکن

ہم تری بات کی تردید نہیں کر سکتے

جیون ہے سڑک اور کنارے پہ کھڑے ہیں

لگتا ہے کہ مدت سے اشارے پہ کھڑے ہیں

طے ہو چکی ہے اس سے جدائی مگر منیرؔ

تو اس کے ساتھ لمحۂ انکار تک تو چل

جس منظر کا حصہ تیری ذات نہیں

میری نظر میں اس کی کوئی اوقات نہیں

بے چہرہ انسانوں کی اس بستی میں

اچھا ہے آئینے توڑ دئے جائیں

لڑ رہا ہوں میں اکیلا کارزار ہست میں

کر فراہم تو بھی ظالم اپنے ہونے کا جواز

سمجھ میں آتا نہیں یہ کیسی نمو ہے مجھ میں

وہ میری مٹی میں کچھ ملا کر چلا گیا ہے

گو حرف و اشک دونوں تھے سامان گفتگو

پھر بھی ہماری بات میں ابہام رہ گیا

کہاں سے ہم اپنی گردشوں کا جواز ڈھونڈیں

ہمارا محور زمیں کے محور سے مختلف ہے

کب سے پہنچ گیا ہوں میں اس شخص کے قریب

کہتی ہے پھر بھی اس کی نظر راستے میں ہوں

اور کیا مفہوم ہوگا خود فریبی کے سوا

تشنگی جلتے ہوئے سورج پہ گر ظاہر کریں

تجھ کو خود سے منہا کرتے

نا ممکن تھا ایسا کرتے

تری صورت میں رہائی مل گئی

آنکھ کتنے منظروں میں قید تھی

بن گئے انسان اپنی ذات میں جنگل منیرؔ

بستیوں سے اڑ گئی ہے بوئے آدم زاد تک

یہ آئینوں کے ہیں یا نقص میرے

بگڑتے جا رہے ہیں عکس میرے

یہ تو اہل جنوں کا مسکن ہے

آپ کیسے جناب صحرا میں

تیری صورت میں رہائی مل گئی

آنکھ کتنے منظروں میں قید تھی

اس وقت سے بچا مجھے اے رب کائنات

حب وطن ہو دل میں وطن کاٹنے لگے

یہ کس طرح کی زمیں پہ ہم نے بنائے شہر مراد رکھی

یہاں پہ کوئی گلاب موسم اتر بھی سکتا ہے اور نہیں بھی