زندگی سے زندگی روٹھی رہی

آدمی سے آدمی برہم رہا

گرمیٔ شدت جذبات بتا دیتا ہے

دل تو بھولی ہوئی ہر بات بتا دیتا ہے

میں کنارے پہ کھڑا ہوں تو کوئی بات نہیں

بہتا رہتا ہے تری یاد کا دریا مجھ میں

جسم اپنے فانی ہیں جان اپنی فانی ہے فانی ہے یہ دنیا بھی

پھر بھی فانی دنیا میں جاوداں تو میں بھی ہوں جاوداں تو تم بھی ہو

تو خوش ہے اپنی دنیا میں

میں تری یاد میں جلتا ہوں

ایک الجھن رات دن پلتی رہی دل میں کہ ہم

کس نگر کی خاک تھے کس دشت میں ٹھہرے رہے

کیسا لمحہ آن پڑا ہے

ہنستا گھر ویران پڑا ہے

امن کے سارے سپنے جھوٹے

سپنوں کی تعبیریں جھوٹی

صرف موسم کے بدلنے ہی پہ موقوف نہیں

درد بھی صورت حالات بتا دیتا ہے

ہم نے جن کو سچا جانا

نکلیں وہ سب باتیں جھوٹی

ہر کوچے میں ارمانوں کا خون ہوا

شہر کے جتنے رستے ہیں سب خونیں ہیں

لوگ چلے ہیں صحراؤں کو

اور نگر سنسان پڑا ہے

درد اٹھا تھا مرے پہلو میں

آخر کار جگر تک پہنچا