پاس سے دیکھا تو جانا کس قدر مغموم ہیں

ان گنت چہرے کہ جن کو شادماں سمجھا تھا میں

سوچتا ہوں تو اور بڑھتی ہے

زندگی ہے کہ پیاس ہے کوئی

کیا اسی کا نام ہے رعنائیٔ بزم حیات

تنگ کمرہ سرد بستر اور تنہا آدمی

نظر میں شوخ شبیہیں لیے ہوئے ہے سحر

ابھی نہ کوئی ادھر سے دھواں دھواں گزرے

شہر میں جرم و حوادث اس قدر ہیں آج کل

اب تو گھر میں بیٹھ کر بھی لوگ گھبرانے لگے

وقت اور حالات پر کیا تبصرہ کیجے کہ جب

ایک الجھن دوسری الجھن کو سلجھانے لگے

انسان کی دنیا میں انساں ہے پریشاں کیوں

مچھلی تو نہیں ہوتی بے چین کبھی جل میں

ہمارے گھر کے آنگن میں ستارے بجھ گئے لاکھوں

ہماری خواب گاہوں میں نہ چمکا صبح کا سورج

وہ جہاں چاہے چلا جائے یہ اس کا اختیار

سوچنا یہ ہے کہ میں خود کو کہاں لے جاؤں گا

صبح آتی ہے دبے پاؤں چلی جاتی ہے

گھیر لیتا ہے مجھے شام ڈھلے سناٹا

ملتا نہیں خود اپنے قدم کا نشاں مجھے

کن مرحلوں میں چھوڑ گیا کارواں مجھے

کوئی دانا کوئی دیوانہ ملا

شہر میں ہر شخص بیگانہ ملا

تم جسے سمجھے ہو دنیا اس کے آنچل کے تلے

گیسوؤں کے پیچ اور خم کے سوا کچھ بھی نہیں

لوگ منزل کی طرف لپکے ہیں لیکن

بھیڑ میں غفلت بھی شامل ہو گئی ہے

تیری پرچھائیں سمٹتی جائے گی

جیسے جیسے پھیلتا جائے گا تو

اپنی دیواروں سے کچھ باہر نکل

صرف خالی گھر کے بام و در نہ دیکھ

لے گیا وہ چھین کر میری جوانی

اس پہ بس یوں ہی جھپٹ کر رہ گیا میں

کر گیا سورج سبھی کو بے لباس

اب کوئی سایہ کوئی پیکر نہ دیکھ

کون دہشت گرد ہے اور کون ہے دہشت زدہ

یہ سب اک ابہام پیہم کے سوا کچھ بھی نہیں

شبستاں در شبستاں ظلمتوں کی ایک یورش ہے

ہر اک دامن سے لپٹا ہے لرزتا ہانپتا سورج