badalte vaqt ne badle mizāj bhī kaise

tirī adā bhī ga.ī merā bāñkpan bhī gayā

badalte waqt ne badle mizaj bhi kaise

teri ada bhi gai mera bankpan bhi gaya

tumhārī yaad nikaltī nahīñ mire dil se

nasha chhalaktā nahīñ hai sharāb se bāhar

tumhaari yaad nikalti nahin mere dil se

nasha chhalakta nahin hai sharab se bahar

usī ne chāñd ke pahlū meñ ik charāġh rakhā

usī ne dasht ke zarroñ ko āftāb kiyā

usi ne chand ke pahlu mein ek charagh rakha

usi ne dasht ke zarron ko aaftab kiya

jin ko chhū kar kitne 'zaidī' apnī jaan gañvā baiThe

mere ahd kī shahnāzoñ ke jism baḌe zahrīle the

jin ko chhu kar kitne 'zaidi' apni jaan ganwa baiThe

mere ahd ki shahnazon ke jism baDe zahrile the

guzrā mire qarīb se vo is adā ke saath

raste ko chhū ke jis tarah rasta guzar gayā

guzra mere qarib se wo is ada ke sath

raste ko chhu ke jis tarah rasta guzar gaya

terī galī ke moḌ pe pahuñche the jald ham

par tere ghar ko aate hue der ho ga.ī

teri gali ke moD pe pahunche the jald hum

par tere ghar ko aate hue der ho gai

zindagī ab tū mujhe aur khilaune lā de

aaise ḳhvāboñ se to maiñ dil nahīñ bahlā saktā

zindagi ab tu mujhe aur khilaune la de

aaise KHwabon se to main dil nahin bahla sakta

phir vahī shaam vahī dard vahī apnā junūñ

jaane kyā yaad thī vo jis ko bhulā.e ga.e ham

phir wahi sham wahi dard wahi apna junun

jaane kya yaad thi wo jis ko bhulae gae hum

zamīn par na rahe āsmāñ ko chhoḌ diyā

tumhāre ba.ad zamān o makāñ ko chhoḌ diyā

zamin par na rahe aasman ko chhoD diya

tumhaare baad zaman o makan ko chhoD diya

bichhaḌ ke tujh se tirī yaad bhī nahīñ aa.ī

makāñ kī samt palaT kar makīñ nahīñ aayā

bichhaD ke tujh se teri yaad bhi nahin aai

makan ki samt palaT kar makin nahin aaya

kin darīchoñ ke charāġhoñ se hameñ nisbat thī

ki abhī jal nahīñ paa.e ki bujhā.e ga.e ham

kin darichon ke charaghon se hamein nisbat thi

ki abhi jal nahin pae ki bujhae gae hum

tamām umr havā kī tarah guzārī hai

agar hue bhī kahīñ to kabhū kabhū hue ham

tamam umr hawa ki tarah guzari hai

agar hue bhi kahin to kabhu kabhu hue hum

bas ek baar vo aayā thā sair karne ko

phir us ke saath hī ḳhushbū ga.ī chaman bhī gayā

bas ek bar wo aaya tha sair karne ko

phir us ke sath hi KHushbu gai chaman bhi gaya

yuuñ jagmagā uThā hai tirī yaad se vajūd

jaise lahū se koī sitāra guzar gayā

yun jagmaga uTha hai teri yaad se wajud

jaise lahu se koi sitara guzar gaya

kisī ke dil meñ utarnā hai kār-e-lā-hāsil

ki saarī dhuup to hai āftāb se bāhar

kisi ke dil mein utarna hai kar-e-la-hasil

ki sari dhup to hai aaftab se bahar

koī bhī rasta kisī samt ko nahīñ jaatā

koī safar mirī takmīl karne vaalā nahīñ

koi bhi rasta kisi samt ko nahin jata

koi safar meri takmil karne wala nahin

vo jis ke haath se taqrīb-e-dil-numā.ī thī

abhī vo lamha-e-maujūd meñ nahīñ aayā

wo jis ke hath se taqrib-e-dil-numai thi

abhi wo lamha-e-maujud mein nahin aaya

us ke laboñ kī guftugū karte rahe subū subū

ya.anī suḳhan hue tamām ya.anī kalām ho chukā

us ke labon ki guftugu karte rahe subu subu

yani suKHan hue tamam yani kalam ho chuka

ḳhud apne hone kā har ik nishāñ miTā Daalā

'shanās' phir kahīñ mauzū-e-guftugū hue ham

KHud apne hone ka har ek nishan miTa Dala

'shanas' phir kahin mauzu-e-guftugu hue hum