خلا میں گروی رکھا اپنے سارے خوابوں کو

اور اس زمین پہ چھوٹا سا گھر لیا میں نے

بس یہی سوچ کے رہتا ہوں میں زندہ اس میں

یہ محبت ہے کوئی مر نہیں سکتا اس میں

تیرا بوسہ ایسا پیالہ ہے جس میں سے

پانی پینے والا پیاسا رہ جائے گا

جس پری پر مر مٹے تھے وہ پری زادی نہ تھی

بعد میں جانا کہ اس کے دونوں پر ہوتے تھے ہم

میں اپنی خوشیاں اکیلے منایا کرتا ہوں

یہی وہ غم ہے جو تجھ سے چھپا ہوا ہے مرا

وہ کیا خوشی تھی جو دل میں بحال رہتی تھی

مگر وجہ نہیں بنتی تھی مسکرانے کی

میں اس کو خواب میں کچھ ایسے دیکھا کرتا تھا

تمام رات وہ سوتے میں مسکراتی تھی

تیری ہی سیر کے لیے آتا رہوں گا بار بار

تیرا تھا سات دن کا شوق میری ہے عمر بھر کی سیر

بہت قدیم نہیں کل کا واقعہ ہے یہ

میں اس زمین پہ اترا تھا تیری ذات کے ساتھ