دن کسی طرح سے کٹ جائے گا سڑکوں پہ شفقؔ

شام پھر آئے گی ہم شام سے گھبرائیں گے

ہونے والا تھا اک حادثہ رہ گیا

کل کا سب سے بڑا واقعہ رہ گیا

اپنی لغزش کو تو الزام نہ دے گا کوئی

لوگ تھک ہار کے مجرم ہمیں ٹھہرائیں گے

سامنے جھیل ہے جھیل میں آسماں

آسماں میں یہ اڑتا ہوا کون ہے

شہر میں جینا ہے چلنا دو رخی تلوار پر

آدمی کس سے بچے کس کی طرف داری کرے

آندھیوں کا خواب ادھورا رہ گیا

ہاتھ میں اک سوکھا پتا رہ گیا

اس سیہ خانے میں تجھ کو جاگنا ہے رات بھر

ان ستاروں کو نہ بے مقصد ہتھیلی پر بجھا

ذہن کی آوارگی کو بھی پناہیں چاہیئے

یوں نہ شمعوں کو کسی دہلیز پر رکھ کر بجھا

شہر کا منظر ہمارے گھر کے پس منظر میں ہے

اب ادھر بھی اجنبی چہرے نظر آنے لگے

آج سوچا ہے جاگوں گا میں رات میں

کچے پھل سا مجھے توڑتا کون ہے

سنا ہے ہر گھڑی تو مسکراتا رہتا ہے

مجھے بھی جذب ذرا کر کے جسم و جاں میں ملا