بوسے بیوی کے ہنسی بچوں کی آنکھیں ماں کی

قید خانے میں گرفتار سمجھئے ہم کو

تعلقات کا تنقید سے ہے یارانہ

کسی کا ذکر کرے کون احتساب کے ساتھ

یہ سچ ہے ہم کو بھی کھونے پڑے کچھ خواب کچھ رشتے

خوشی اس کی ہے لیکن حلقۂ شر سے نکل آئے

چمکتے چاند سے چہروں کے منظر سے نکل آئے

خدا حافظ کہا بوسہ لیا گھر سے نکل آئے

احساس جرم جان کا دشمن ہے جعفریؔ

ہے جسم تار تار سزا کے بغیر بھی

جو بھر بھی جائیں دل کے زخم دل ویسا نہیں رہتا

کچھ ایسے چاک ہوتے ہیں جو جڑ کر بھی نہیں سلتے

کس درد سے روشن ہے سیہ خانۂ ہستی

سورج نظر آتا ہے ہمیں رات گئے بھی

دشت تنہائی میں جینے کا سلیقہ سیکھئے

یہ شکستہ بام و در بھی ہم سفر ہو جائیں گے

آتش فشاں زباں ہی نہیں تھی بدن بھی تھا

دریا جو منجمد ہے کبھی موجزن بھی تھا

گھر سے باہر نہیں نکلا جاتا

روشنی یاد دلاتی ہے تری

آٹھوں پہر لہو میں نہایا کرے کوئی

یوں بھی نہ اپنے درد کو دریا کرے کوئی

مزاج الگ سہی ہم دونوں کیوں الگ ہوں کہ ہیں

سراب و آب میں پوشیدہ قربتیں کیا کیا

اخلاق و شرافت کا اندھیرا ہے وہ گھر میں

جلتے نہیں معصوم گناہوں کے دیے بھی

میں اور مری ذات اگر ایک ہی شے ہیں

پھر برسوں سے دونوں میں صف آرائی سی کیوں ہے

کوئی منزل آخری منزل نہیں ہوتی فضیلؔ

زندگی بھی ہے مثال موج دریا راہ رو

ہر آدمی میں تھے دو چار آدمی پنہاں

کسی کو ڈھونڈنے نکلا کوئی ملا مجھ کو

دل یوں تو گاہ گاہ سلگتا ہے آج بھی

منظر مگر وہ رقص شرر کا نہیں رہا

ترے بدن میں مرے خواب مسکراتے ہیں

دکھا کبھی مرے خوابوں کا آئینہ مجھ کو

ضد میں دنیا کی بہرحال ملا کرتے تھے

ورنہ ہم دونوں میں ایسی کوئی الفت بھی نہ تھی

منزلیں سمتیں بدلتی جا رہی ہیں روز و شب

اس بھری دنیا میں ہے انسان تنہا راہ رو

بھولے بسرے ہوئے غم پھر ابھر آتے ہیں کئی

آئینہ دیکھیں تو چہرے نظر آتے ہیں کئی

اک خوف سا درختوں پہ طاری تھا رات بھر

پتے لرز رہے تھے ہوا کے بغیر بھی

زہر میٹھا ہو تو پینے میں مزا آتا ہے

بات سچ کہیے مگر یوں کہ حقیقت نہ لگے