کہتے ہیں عید ہے آج اپنی بھی عید ہوتی

ہم کو اگر میسر جاناں کی دید ہوتی

درد الفت کا نہ ہو تو زندگی کا کیا مزا

آہ و زاری زندگی ہے بے قراری زندگی

آہ! کل تک وہ نوازش! آج اتنی بے رخی

کچھ تو نسبت چاہئے انجام کو آغاز سے

میرے پہلو میں تم آؤ یہ کہاں میرے نصیب

یہ بھی کیا کم ہے تصور میں تو آ جاتے ہو

ناز نے پھر کیا آغاز وہ انداز نیاز

حسن جاں سوز کو پھر سوز کا دعویٰ ہے وہی

محو دید چمن شوق ہے پھر دیدۂ شوق

گل شاداب وہی بلبل شیدا ہے وہی

دانہ و دام سنبھالا مرے صیاد نے پھر

اپنی گردن ہے وہی عشق کا پھندا ہے وہی