مدتیں گزریں ملاقات ہوئی تھی تم سے

پھر کوئی اور نہ آیا نظر آئینے میں

اپنے کاندھوں پہ لیے پھرتا ہوں اپنی ہی صلیب

خود مری موت کا ماتم ہے مرے جینے میں

انا انا کے مقابل ہے راہ کیسے کھلے

تعلقات میں حائل ہے بات کی دیوار

تمام عالم سے موڑ کر منہ میں اپنے اندر سما گیا ہوں

مجھے نہ آواز دے زمانہ میں اپنی آواز سن رہا ہوں

ملے وہ لمحہ جسے اپنا کہہ سکیں کیفیؔ

گزر رہے ہیں اسی جستجو میں ماہ و سال

اپنی جانب نہیں اب لوٹنا ممکن میرا

ڈھل گیا ہوں میں سراپا ترے آئینے میں

شب دراز کا ہے قصہ مختصر کیفیؔ

ہوئی سحر کے اجالوں میں گم چراغ کی لو

مرے خلوص کا یاروں نے آسرا لے کر

کیا ہے خوب مری دوستی کا استحصال

بکھر کے ریت ہوئے ہیں وہ خواب دیکھے ہیں

مری نگاہ نے کتنے سراب دیکھے ہیں

سب نظر آتے ہیں چہرے گرد گرد

کیا ہوئے بے آب آئینے تمام

کوئی بھی رت ہو ملی ہے دکھوں کی فصل ہمیں

جو موسم آیا ہے اس کے عتاب دیکھے ہیں