muddateñ guzrīñ mulāqāt huī thī tum se

phir koī aur na aayā nazar ā.īne meñ

muddaten guzrin mulaqat hui thi tum se

phir koi aur na aaya nazar aaine mein

apne kāñdhoñ pe liye phirtā huuñ apnī hī salīb

ḳhud mirī maut kā mātam hai mire jiine meñ

apne kandhon pe liye phirta hun apni hi salib

KHud meri maut ka matam hai mere jine mein

anā anā ke muqābil hai raah kaise khule

ta.alluqāt meñ haa.il hai baat kī dīvār

ana ana ke muqabil hai rah kaise khule

talluqat mein hail hai baat ki diwar

tamām aalam se moḌ kar muñh maiñ apne andar samā gayā huuñ

mujhe na āvāz de zamāne maiñ apnī āvāz sun rahā huuñ

tamam aalam se moD kar munh main apne andar sama gaya hun

mujhe na aawaz de zamane main apni aawaz sun raha hun

mile vo lamha jise apnā kah sakeñ 'kaifī'

guzar rahe haiñ isī justujū meñ māh-o-sāl

mile wo lamha jise apna kah saken 'kaifi'

guzar rahe hain isi justuju mein mah-o-sal

apnī jānib nahīñ ab lauTnā mumkin merā

Dhal gayā huuñ maiñ sarāpā tire ā.īne meñ

apni jaanib nahin ab lauTna mumkin mera

Dhal gaya hun main sarapa tere aaine mein

shab-e-darāz kā hai qissa muḳhtasar 'kaifī'

huī sahar ke ujāloñ meñ gum charāġh kī lau

shab-e-daraaz ka hai qissa muKHtasar 'kaifi'

hui sahar ke ujalon mein gum charagh ki lau

mire ḳhulūs kā yāroñ ne aasrā le kar

kiyā hai ḳhuub mirī dostī kā istehsāl

mere KHulus ka yaron ne aasra le kar

kiya hai KHub meri dosti ka istehsal

bikhar ke ret hue haiñ vo ḳhvāb dekhe haiñ

mirī nigāh ne kitne sarāb dekhe haiñ

bikhar ke ret hue hain wo KHwab dekhe hain

meri nigah ne kitne sarab dekhe hain

sab nazar aate haiñ chehre gard gard

kyā hue be-āb ā.īne tamām

sab nazar aate hain chehre gard gard

kya hue be-ab aaine tamam

koī bhī rut ho milī hai dukhoñ kī fasl hameñ

jo mausam aayā hai us ke itaab dekhe haiñ

koi bhi rut ho mili hai dukhon ki fasl hamein

jo mausam aaya hai us ke itab dekhe hain