vo ik jagah na kahīñ rah sakā aur us ke saath

kirāya-dār the ham bhī makāñ badalte rahe

wo ek jagah na kahin rah saka aur us ke sath

kiraya-dar the hum bhi makan badalte rahe

agar jahāñ meñ koī aa.inā nahīñ terā

to phir tujhī ko tire rū-ba-rū karūñgā maiñ

agar jahan mein koi aaina nahin tera

to phir tujhi ko tere ru-ba-ru karunga main

shā'irī kyā hai mirī jaañ tujhe mā'lūm nahīñ

ek tohmat hai jo mujh par bhī lagā dī ga.ī hai

sha'iri kya hai meri jaan tujhe ma'lum nahin

ek tohmat hai jo mujh par bhi laga di gai hai

vo ḳhafā haiñ to raheñ ham ko manānā bhī nahīñ

un ko aanā bhī nahīñ ham ko bulānā bhī nahīñ

wo KHafa hain to rahen hum ko manana bhi nahin

un ko aana bhi nahin hum ko bulana bhi nahin

har shai ko zamīñ apnī taraf khīñch rahī hai

kab aatā hai dhartī pe gagan dekhte rahnā

har shai ko zamin apni taraf khinch rahi hai

kab aata hai dharti pe gagan dekhte rahna

khil uTThā mere dil kā chaman bhī pas-e-visāl

ḳhitte tire badan ke bhī shādāb ho ga.e

khil uTTha mere dil ka chaman bhi pas-e-visal

KHitte tere badan ke bhi shadab ho gae

hai dhuup bhī is ke liye thoḌī sī zarūrī

ye naḳhl ghanī chhāñv meñ murjhāne lagā hai

hai dhup bhi is ke liye thoDi si zaruri

ye naKHl ghani chhanw mein murjhane laga hai

kāfūr huī jab se mire dil kī syāhī

har chehra mujhe saaf nazar aane lagā hai

kafur hui jab se mere dil ki syahi

har chehra mujhe saf nazar aane laga hai

gulshan meñ ye bahār rukī hī rahegī kyā

ye chāñdnī badan kī khilī hī rahegī kyā

gulshan mein ye bahaar ruki hi rahegi kya

ye chandni badan ki khili hi rahegi kya

safar ho ḳhatm to shāyad ye fāsla miT jaa.e

abhī to maiñ huuñ zamīñ par vo āsmān pe hai

safar ho KHatm to shayad ye fasla miT jae

abhi to main hun zamin par wo aasman pe hai

kamī kuchh apne hī zauq-e-talab meñ hai varna

du'ā kā harf kabhī be-asar nahīñ jaatā

kami kuchh apne hi zauq-e-talab mein hai warna

du'a ka harf kabhi be-asar nahin jata

jab pahlī baar gaañv se vo shahr ko gayā

hairat se ūñche ūñche bhavan dekhtā rahā

jab pahli bar ganw se wo shahr ko gaya

hairat se unche unche bhawan dekhta raha

'ishq meñ jal jal ke kundan ban gayā huuñ sar-basar

ab bhī kyā merā ḳhudā dozaḳh meñ Dālegā mujhe

'ishq mein jal jal ke kundan ban gaya hun sar-basar

ab bhi kya mera KHuda dozaKH mein Dalega mujhe

milī na ham ko shahādat to kyā ye kyā kam hai

ki saarī 'umr rah-e-karbalā pe chalte rahe

mili na hum ko shahadat to kya ye kya kam hai

ki sari 'umr rah-e-karbala pe chalte rahe

bazm meñ aate hī us ke bujh ga.iiñ āñkheñ tamām

sab ke sab dīdār kī hasrat liye baiThe rahe

bazm mein aate hi us ke bujh gain aankhen tamam

sab ke sab didar ki hasrat liye baiThe rahe

mire qabīle kā har shaḳhs mujh se bad-zan hai

mirī ḳhatā hai bas itnī ki sochtā huuñ maiñ

mere qabile ka har shaKHs mujh se bad-zan hai

meri KHata hai bas itni ki sochta hun main

sūraj ko jaane kis ke taqaddus kā hai ḳhayāl

maġhrib kī samt jab bhī gayā sar ke bal gayā

suraj ko jaane kis ke taqaddus ka hai KHayal

maghrib ki samt jab bhi gaya sar ke bal gaya

kisī kā vasl to jannat kā ḳhvān hai 'najmī'

ye mann-va-salvā hamesha nahīñ utartā hai

kisi ka wasl to jannat ka KHwan hai 'najmi'

ye mann-wa-salwa hamesha nahin utarta hai

tire jamāl kī dekhī jo sādgī ham ne

banā liyā use uslūb-e-shā’irī ham ne

tere jamal ki dekhi jo sadgi hum ne

bana liya use uslub-e-sha’iri hum ne

'ajab qātil ho tum thakte nahīñ ho qatl karne se

kabhī ḳhanjar tumhārā ḳhuun se be-dam nahīñ hotā

'ajab qatil ho tum thakte nahin ho qatl karne se

kabhi KHanjar tumhaara KHun se be-dam nahin hota

bhalā vo ḳhaak samjheñge ḳhudā kyā hai ḳhudī kyā hai

jo ab tak ye nahīñ samjhe maqām-e-ādmī kyā hai

bhala wo KHak samjhenge KHuda kya hai KHudi kya hai

jo ab tak ye nahin samjhe maqam-e-admi kya hai

har haal meñ ḳhush rahnā har roz ġhazal kahnā

ham ne yahī jiine kī ik raah nikālī hai

har haal mein KHush rahna har roz ghazal kahna

hum ne yahi jine ki ek rah nikali hai

mirī nazar meñ koī shai nahīñ Thahartī hai

tumhārā husn magar jam rahā hai āñkhoñ meñ

meri nazar mein koi shai nahin Thaharti hai

tumhaara husn magar jam raha hai aankhon mein

bas meñ jo kuchh thā vo maiñ ne kar diyā

ab vo 'izzat de ki zillat de mujhe

bas mein jo kuchh tha wo main ne kar diya

ab wo 'izzat de ki zillat de mujhe

rakhtā thā vo bhī merī ravish par kaḌī nigāh

aur maiñ bhī us kā chāl-chalan dekhtā rahā

rakhta tha wo bhi meri rawish par kaDi nigah

aur main bhi us ka chaal-chalan dekhta raha

maiñ sāda-lauh kartā bhī kyā tere shahr meñ

chup-chāp yaar logoñ kā fan dekhtā rahā

main sada-lauh karta bhi kya tere shahr mein

chup-chap yar logon ka fan dekhta raha

kījiye kyā un se aḳhlāq-o-muravvat kī umiid

ye haiñ sab ke sab na.ī tahzīb ke paale hue

kijiye kya un se aKHlaq-o-murawwat ki umid

ye hain sab ke sab nai tahzib ke pale hue

ulajhnā lafzoñ se sheva hai kam-nigāhoñ kā

jo dīda-var haiñ vo bainassutūr dekhte haiñ

ulajhna lafzon se shewa hai kam-nigahon ka

jo dida-war hain wo bainassutur dekhte hain

tirī talāsh meñ niklā jo bū-e-gul kī tarah

palaT ke phir vo kabhī apne ghar nahīñ jaatā

teri talash mein nikla jo bu-e-gul ki tarah

palaT ke phir wo kabhi apne ghar nahin jata

ye alag baat ki saaya hai salāmat us kā

varna dīvār to chāhat kī girā dī ga.ī hai

ye alag baat ki saya hai salamat us ka

warna diwar to chahat ki gira di gai hai

hai dīda-var to ek nazar meñ parakh mujhe

lāzim nahīñ kisī ko ka.ī baar dekhnā

hai dida-war to ek nazar mein parakh mujhe

lazim nahin kisi ko kai bar dekhna

javāz kuchh nahīñ hotā hamārī ḳhushiyoñ kā

udaas rahne kā koī sabab nahīñ hotā

jawaz kuchh nahin hota hamari KHushiyon ka

udas rahne ka koi sabab nahin hota

zamāne se maiñ nā-qadrī kā shikva kyā karūñ 'najmī'

ḳhud apnī hī nazar se 'umr bhar ojhal rahā huuñ maiñ

zamane se main na-qadri ka shikwa kya karun 'najmi'

KHud apni hi nazar se 'umr bhar ojhal raha hun main

mire paikar meñ lākhoñ sūrajoñ kī aag pinhāñ hai

ġharīq-e-āb huuñ phir bhī musalsal jal rahā huuñ maiñ

mere paikar mein lakhon surajon ki aag pinhan hai

ghariq-e-ab hun phir bhi musalsal jal raha hun main

tire ġham ne 'atā kī hai 'ajab pākīzgī mujh ko

maiñ rotā huuñ to āñkhoñ se mirī zamzam nikaltā hai

tere gham ne 'ata ki hai 'ajab pakizgi mujh ko

main rota hun to aankhon se meri zamzam nikalta hai

tū purāne-pan pe mere itnā afsurda na ho

aane vaale kal ko maiñ phir se nayā ho jā.ūñgā

tu purane-pan pe mere itna afsurda na ho

aane wale kal ko main phir se naya ho jaunga

band hoñ āñkheñ to duniyā saaf aatī hai nazar

ham yūñhī āñkhoñ pe parda to na the Daale hue

band hon aankhen to duniya saf aati hai nazar

hum yunhi aankhon pe parda to na the Dale hue

jab se ghar vaale ziyāda ham ko samjhāne lage

bhuul baiThe the jinheñ ham vo bhī yaad aane lage

jab se ghar wale ziyaada hum ko samjhane lage

bhul baiThe the jinhen hum wo bhi yaad aane lage

tabsira karte rahe ham zulmatoñ par

kho gayā saarā asāsa raushnī meñ

tabsira karte rahe hum zulmaton par

kho gaya sara asasa raushni mein

shikast kar na sakā koī ġhaznavī us ko

vo ek but jo mire dil ke somnāt meñ hai

shikast kar na saka koi ghaznawi us ko

wo ek but jo mere dil ke somnat mein hai

nasha vujūd kā jab tak utar nahīñ jaatā

diloñ se khoT nigāhoñ se shar nahīñ jaatā

nasha wujud ka jab tak utar nahin jata

dilon se khoT nigahon se shar nahin jata

ye vasl kī ḳhvāhish bhī miyāñ bul-havasī hai

jis dil meñ mohabbat ho tamanna nahīñ hotī

ye wasl ki KHwahish bhi miyan bul-hawasi hai

jis dil mein mohabbat ho tamanna nahin hoti

nuqta na thā lakīr na thā dā.era na thā

vo harf thā maiñ jis ko kisī ne likhā na thā

nuqta na tha lakir na tha daera na tha

wo harf tha main jis ko kisi ne likha na tha

is shahr meñ kisī ko mayassar na thā sukūñ

ronā kisī ko dil kā kisī ko anā kā thā

is shahr mein kisi ko mayassar na tha sukun

rona kisi ko dil ka kisi ko ana ka tha

mire maulā ye kaisā vasvasa aayā mire dil meñ

ab us ke sāmne jaate hue bhī Dar rahā huuñ maiñ

mere maula ye kaisa waswasa aaya mere dil mein

ab us ke samne jate hue bhi Dar raha hun main

aag aisī hai kuchh us meñ ki bujhānā hai muhāl

barf aisī hai ki pighlā nahīñ saktā koī

aag aisi hai kuchh us mein ki bujhana hai muhaal

barf aisi hai ki pighla nahin sakta koi

us meñ jo kuchh hai 'alāva husn ke

chhāñT detā hai mirā tār-e-nazar

us mein jo kuchh hai 'alawa husn ke

chhanT deta hai mera tar-e-nazar

tū mere haq meñ koī faisla abhī se na kar

ki lamha lamha maiñ ḳhud ko nayā banātā huuñ

tu mere haq mein koi faisla abhi se na kar

ki lamha lamha main KHud ko naya banata hun

bisāt-e-ḳhāk par behad qad-āvar lag rahe the jo

bulandī par pahuñch kar vo bahut chhoTe nazar aa.e

bisat-e-KHak par behad qad-awar lag rahe the jo

bulandi par pahunch kar wo bahut chhoTe nazar aae