بہت تاخیر سے پایا ہے خود کو

میں اپنے صبر کا پھل ہو گئی ہوں

سنا ہے خواب مکمل کبھی نہیں ہوتے

سنا ہے عشق خطا ہے سو کر کے دیکھتے ہیں

ذکر سنتی ہوں اجالے کا بہت

اس سے کہنا کہ مرے گھر آئے

حضور آپ کوئی فیصلہ کریں تو سہی

ہیں سر جھکے ہوئے دربار بھی لگا ہوا ہے

تعلق کی نئی اک رسم اب ایجاد کرنا ہے

نہ اس کو بھولنا ہے اور نہ اس کو یاد کرنا ہے

گزر جائے گی ساری رات اس میں

مرا قصہ کہانی سے بڑا ہے

مرے دل کے اکیلے گھر میں راحتؔ

اداسی جانے کب سے رہ رہی ہے

جہاں اک شخص بھی ملتا نہیں ہے چاہنے سے

وہاں یہ دل ہتھیلی پر زمانہ چاہتا ہے

یہ کس کی یاد کی بارش میں بھیگتا ہے بدن

یہ کیسا پھول سر شاخ جاں کھلا ہوا ہے

بنا کر ایک گھر دل کی زمیں پر اس کی یادوں کا

کبھی آباد کرنا ہے کبھی برباد کرنا ہے

جو منزل تک جا کے اور کہیں مڑ جائے

تم ایسے رستے کے دکھ سے ناواقف ہو

نہ ہم سے عشق کا مفہوم پوچھو

یہ لفظ اپنے معانی سے بڑا ہے

وہ عشق کو کس طرح سمجھ پائے گا جس نے

صحرا سے گلے ملتے سمندر نہیں دیکھا

وہ مجھ کو آزماتا ہی رہا ہے زندگی بھر

مگر یہ دل اب اس کو آزمانا چاہتا ہے

خوشی میری گوارہ تھی نہ قسمت کو نہ دنیا کو

سو میں کچھ غم برائے خاطر احباب اٹھا لائی

اسے بھی زندگی کرنی پڑے گی میرؔ جیسی

سخن سے گر کوئی رشتہ نبھانا چاہتا ہے

کبھی کبھی تو جدا بے سبب بھی ہوتے ہیں

سدا زمانے کی تقصیر تھوڑی ہوتی ہے

وہ اور تھے کہ جو ناخوش تھے دو جہاں لے کر

ہمارے پاس تو بس اک جہان تھا نہ رہا

فسانہ اب کوئی انجام پانا چاہتا ہے

تعلق ٹوٹنے کو اک بہانہ چاہتا ہے