jaane kab kaun kise maar de kāfir kah ke

shahr kā shahr musalmān huā phirtā hai

jaane kab kaun kise mar de kafir kah ke

shahr ka shahr musalman hua phirta hai

vaqt kī mauj hameñ paar lagātī kaise

ham ne hī jism se bāñdhe hue patthar the bahut

waqt ki mauj hamein par lagati kaise

hum ne hi jism se bandhe hue patthar the bahut

vo dil kā TūTnā to koī vāqi.a na thā

ab TuuTe dil kī kirchiyoñ kī dhaar se bacho

wo dil ka TuTna to koi waqia na tha

ab TuTe dil ki kirchiyon ki dhaar se bacho

band kar baiThe ho ghar radd-e-balā kī ḳhātir

ek khiḌkī to khulī rakhte havā kī ḳhātir

band kar baiThe ho ghar radd-e-bala ki KHatir

ek khiDki to khuli rakhte hawa ki KHatir

tū ne dastak hī nahīñ dī kisī darvāze par

varna khulne ko to dīvār meñ bhī dar the bahut

tu ne dastak hi nahin di kisi darwaze par

warna khulne ko to diwar mein bhi dar the bahut

mire vajūd meñ vo is tarah samo jaa.e

jo mere paas hai sab kuchh usī kā ho jaa.e

mere wajud mein wo is tarah samo jae

jo mere pas hai sab kuchh usi ka ho jae