ab to tere husn kī har anjuman meñ dhuum hai

jis ne merā haal dekhā terā dīvāna huā

ab to tere husn ki har anjuman mein dhum hai

jis ne mera haal dekha tera diwana hua

dil jahāñ le jaa.e dil ke saath jaanā chāhiye

is se baḌh kar aur koī rahnumā hotā nahīñ

dil jahan le jae dil ke sath jaana chahiye

is se baDh kar aur koi rahnuma hota nahin

terī duurī bhī hai mushkil tirī qurbat bhī muhāl

kis qadar tū ne mirī jaan satāyā hai mujhe

teri duri bhi hai mushkil teri qurbat bhi muhaal

kis qadar tu ne meri jaan sataya hai mujhe

terī duniyā meñ tire husn kā shaidā.ī huuñ

ai ḳhudā mujh ko gunahgār na samjhā jaa.e

teri duniya mein tere husn ka shaidai hun

ai KHuda mujh ko gunahgar na samjha jae

ai ḳhudā tū hī be-misāl nahīñ

maiñ bhī huuñ kā.enāt meñ tanhā

ai KHuda tu hi be-misal nahin

main bhi hun kaenat mein tanha