ایک اک بات میں سچائی ہے اس کی لیکن

اپنے وعدوں سے مکر جانے کو جی چاہتا ہے

بات نکلے گی تو پھر دور تلک جائے گی

لوگ بے وجہ اداسی کا سبب پوچھیں گے

مکاں شیشے کا بنواتے ہو آزرؔ

بہت آئیں گے پتھر دیکھ لینا

صبح لے جاتے ہیں ہم اپنا جنازہ گھر سے

شام کو پھر اسے کاندھوں پہ اٹھا لاتے ہیں

کمرے میں پھیلتا رہا سگریٹ کا دھواں

میں بند کھڑکیوں کی طرف دیکھتا رہا

اس کی آنکھوں میں اتر جانے کو جی چاہتا ہے

شام ہوتی ہے تو گھر جانے کو جی چاہتا ہے

کب آؤ گے یہ گھر نے مجھ سے چلتے وقت پوچھا تھا

یہی آواز اب تک گونجتی ہے میرے کانوں میں

کوئی منزل نہیں ملتی تو ٹھہر جاتے ہیں

اشک آنکھوں میں مسافر کی طرح آتے ہیں

میں اپنے آپ سے ہر دم خفا رہتا ہوں یوں آزرؔ

پرانی دشمنی ہو جس طرح دو خاندانوں میں

جاتے جاتے یہ نشانی دے گیا

وہ مری آنکھوں میں پانی دے گیا

تمہاری بزم سے نکلے تو ہم نے یہ سوچا

زمیں سے چاند تلک کتنا فاصلہ ہوگا

تم کو ماحول سے ہو جائے گی نفرت آزرؔ

اتنے نزدیک سے دیکھا نہ کرو یاروں کو

حل نہ تھا مشکل کا کوئی اس کے پاس

صرف وعدے آسمانی دے گیا

اداسی کا سمندر دیکھ لینا

مری آنکھوں میں آ کر دیکھ لینا

اک سہما ہوا سنسان گلی کا نکڑ

شہر کی بھیڑ میں اکثر مجھے یاد آیا ہے

بات نکلے گی تو پھر دور تلک جائے گی

لوگ بے وجہ اداسی کا سبب پوچھیں گے

جب سے اک خواب کی تعبیر ملی ہے مجھ کو

میں ہر اک خواب کی تعبیر سے گھبراتا ہوں

یہ حادثہ تو ہوا ہی نہیں ہے تیرے بعد

غزل کسی کو کہا ہی نہیں ہے تیرے بعد

یہ حادثہ بھی ترے شہر میں ہوا ہوگا

تمام شہر مجھے ڈھونڈھتا پھرا ہوگا

میرے ہاتھوں سے کھلونے چھین کر

مجھ کو زخموں کی کہانی دے گیا

ہم بھی ان بچوں کی مانند کوئی پل جی لیں

ایک سکہ جو ہتھیلی پہ سجا لاتے ہیں