منتظر ہوں تری آواز سے تصویر تلک

ایک وقفہ ہی تو درکار تھا ملنے کے لیے

خط شکستہ میں کیا جانے کب کشید آ جائے

کہ سانس روک کے کریو میاں کتابت عشق

اس ایک لمحے کی رائیگانی کا دکھ ہے سارا

وہ تیری قربت میں جو گزرنے سے رہ گیا تھا

آ جاتی ہیں کچھ خوشیاں اندیشوں میں

کچھ اندیشے خوشیوں میں آ جاتے ہیں

کھڑکی کا یہ بھاری پردہ

ہجر میں ململ ہو جاتا ہے

آخری پرندے کی ڈوبتی ہوئی آواز

شام ہونے والی ہے اب ہمیں اجازت ہے

صف بہ صف تیری محبت نے سنبھالا ہم کو

اور ہم ٹوٹ کے بکھرے بھی تو یکجائی رہی

دل دھڑکنے کا سبب زندگی ہو سکتی ہے

یہ ضروری تو نہیں ہے کہ تری یاد ہی ہو

آنکھ کو نم کیے بغیر دل کو برا کئے بغیر

اس کی گلی سے آ گئے ہم تو صدا کیے بغیر

ہوا ٹکرا رہی ہے کینوس سے

بکھرتے جا رہے ہیں رنگ سارے

اب حال یہ ہے کہ رات ہے اور

سنسان سی ایک رہ گزر ہے

کل دوپہر کو ساتھ رہا تھا وہ دیر تک

پھر اس کے بعد شام رہی شام ہی رہی

اور کھلتی ہی چلی جائے گی شب

ہم تری زلف اگر کھولتے جائیں

حبس بڑھتا ہے آہ بھرنے سے

میرے حصے کی سانس مت کھینچو

یہ صور ہے دوسری دفعہ کا

اور لوگ تمام سو رہے ہیں

یہ تو ہم شہر میں کچھ دن سے نہیں ہیں ورنہ

کیا تمہاری وہ چلے گی جو ہماری چلی ہے

آواز پہ کون ٹھیرتا ہے

رک جاؤ گے ہم جہاں کہیں گے

ہمارے چاک گریباں کا تار تھا یہ کبھی

یہ جس پھریرے کو نکلے ہیں آپ لہرانے

شجر پر جب سے ہرجانے لگے ہیں

پرندے چھوڑ کر جانے لگے ہیں

ایک ہی در تھا گلی میں وہ بھی دروازہ ہوا

جب سے ہر آواز پر بے کار میں کھلنے لگا

غم کہاں دیکھنے کی شے ہے مگر

دیدنی ہے وہ سوگوار نکھار

وہ اک آواز تھی منزل نہیں تھی

مگر میں اس کی جانب چل پڑا تھا

پریشاں ہے بہت اس درد سے دل

ہوا ٹھہرے تو کچھ تدبیر ٹھہرے

کھیل رچا کر شہر اجاڑیں کٹھ پتلی کے ساتھ

لشکر کے سالار تماشا گر بھی ہوتے ہیں

تیز ہوتی ہے سر شام ہوا

اور ہو جاتی ہے سفاک الگ

اور آتا اگر خیال ان کا

اور سرشار ہو گئے ہوتے

نظروں کا بے چین بگولہ گرد اڑاتا پھرتا ہے

جس محفل میں تم نہیں ہوتے اس محفل کے صحرا میں

مان لینا ہے ضروری جاننے سے

تیرگی میں آئینے کو دیکھنا کیا

میں نے ہجرت کو لکھا واقعۂ گمشدگی

اور پڑاؤ میں ہوئی موت کو منزل لکھا

نہ بن پڑی کوئی صورت تو ایک دن گھر سے

میں چل دیا کسی نقصان کی تلافی میں

دکھائی بھی نہیں دے گی بدن غرقاب کر کے

میان وصل اک چالاک خاک اڑتی رہے گی