har soch meñ sañgīn fazāoñ kā fasāna

har fikr meñ shāmil huā tahrīr kā mātam

har soch mein sangin fazaon ka fasana

har fikr mein shamil hua tahrir ka matam

parvāz meñ thā amn kā ma.asūm parinda

sunte haiñ ki be-chāra shajar tak nahīñ pahuñchā

parwaz mein tha amn ka masum parinda

sunte hain ki be-chaara shajar tak nahin pahuncha

aah to ab bhī dil se uThtī hai

lekin us meñ asar nahīñ hotā

aah to ab bhi dil se uThti hai

lekin us mein asar nahin hota

maiñ ki tere dhyān meñ gum thā

duniyā mujh ko DhūñDh rahī thī

main ki tere dhyan mein gum tha

duniya mujh ko DhunDh rahi thi

yaad na aane kā va.ada kar ke

vo to pahle se sivā yaad aayā

yaad na aane ka wada kar ke

wo to pahle se siwa yaad aaya

ek nazar meñ us ne har ik dil ko jiit liyā

ek nazar meñ us ke ho ga.e jaane kitne log

ek nazar mein us ne har ek dil ko jit liya

ek nazar mein us ke ho gae jaane kitne log

muddat se mohabbat ke safar meñ huuñ 'karāmat'

lekin abhī chāhat ke nagar tak nahīñ pahuñchā

muddat se mohabbat ke safar mein hun 'karamat'

lekin abhi chahat ke nagar tak nahin pahuncha

ye bādal ġham ke mausam ke jo chhaT jaate to achchhā thā

ye phailā.e hue manzar simaT jaate to achchhā thā

ye baadal gham ke mausam ke jo chhaT jate to achchha tha

ye phailae hue manzar simaT jate to achchha tha

zarūrī to nahīñ ik fasl-e-gul ho

junūñ ke aur bhī mausam bahut haiñ

zaruri to nahin ek fasl-e-gul ho

junun ke aur bhi mausam bahut hain

gavāhī ke liye kaafī rahegā

maiñ apnā ḳhuun muñh pe mal rahā huuñ

gawahi ke liye kafi rahega

main apna KHun munh pe mal raha hun