چند لمحوں کے لیے ایک ملاقات رہی

پھر نہ وہ تو نہ وہ میں اور نہ وہ رات رہی

اپنے وحشت زدہ کمرے کی اک الماری میں

تیری تصویر عقیدت سے سجا رکھی ہے

ضرور تیری گلی سے گزر ہوا ہوگا

کہ آج باد صبا بے قرار آئی ہے

اے مسیحا کبھی تو بھی تو اسے دیکھنے آ

تیرے بیمار کو سنتے ہیں کہ آرام نہیں

تجھے کچھ اس کی خبر بھی ہے بھولنے والے

کسی کو یاد تیری بار بار آئی ہے

وہ مل نہ سکے یاد تو ہے ان کی سلامت

اس یاد سے بھی ہم نے بہت کام لیا ہے

حال دل اس کو سنا کر ہے بہت خوش کوثرؔ

لیکن اب سوچ ذرا کیا تری اوقات رہی

بے سبب آج آنکھ پر نم ہے

جانے کس بات کا مجھے غم ہے

یہ درد کہ ہے تیری محبت کی امانت

مر جائیں گے اس درد کا درماں نہ کریں گے

اس نے اخلاص کے مارے ہوئے دیوانے کو

ایک آوارہ و بد نام سا شاعر جانا

پرکھنے والے مجھے دیکھ اس طرح بھی ذرا

اگر ہے کھوٹ تو کیسے چمک رہا ہوں میں

میں نے ہر گام اسے اول و آخر جانا

لیکن اس نے مجھے لمحوں کا مسافر جانا

تباہی کی گھڑی شاید زمانے پر نہیں آئی

ابھی اپنے کئے پر آدمی شرما ہی جاتا ہے

جذبات میں آ کر مرنا تو مشکل سی کوئی مشکل ہی نہیں

اے جان جہاں ہم تیرے لیے جینا بھی گوارا کرتے ہیں

ہر مرحلۂ غم میں ملی اس سے تسلی

ہر موڑ پہ گھبرا کے ترا نام لیا ہے

بر سر عام اقرار اگر نا ممکن ہے تو یوں ہی سہی

کم از کم ادراک تو کر لے گن بے شک مت مان مرے

منجدھار میں ناؤ ڈوب گئی تو موجوں سے آواز آئی

دریائے محبت سے کوثرؔ یوں پار اتارا کرتے ہیں