chand lamhoñ ke liye ek mulāqāt rahī

phir na vo tū na vo maiñ aur na vo raat rahī

chand lamhon ke liye ek mulaqat rahi

phir na wo tu na wo main aur na wo raat rahi

apne vahshat-zada kamre kī ik almārī meñ

terī tasvīr aqīdat se sajā rakkhī hai

apne wahshat-zada kamre ki ek almari mein

teri taswir aqidat se saja rakkhi hai

zarūr terī galī se guzar huā hogā

ki aaj bād-e-sabā be-qarār aa.ī hai

zarur teri gali se guzar hua hoga

ki aaj baad-e-saba be-qarar aai hai

ai masīhā kabhī tū bhī to use dekhne aa

tere bīmār ko sunte haiñ ki ārām nahīñ

ai masiha kabhi tu bhi to use dekhne aa

tere bimar ko sunte hain ki aaram nahin

tujhe kuchh us kī ḳhabar bhī hai bhūlne vaale

kisī ko yaad terī baar baar aa.ī hai

tujhe kuchh us ki KHabar bhi hai bhulne wale

kisi ko yaad teri bar bar aai hai

vo mil na sake yaad to hai un kī salāmat

is yaad se bhī ham ne bahut kaam liyā hai

wo mil na sake yaad to hai un ki salamat

is yaad se bhi hum ne bahut kaam liya hai

hāl-e-dil us ko sunā kar hai bahut ḳhush 'kausar'

lekin ab soch zarā kyā tirī auqāt rahī

haal-e-dil us ko suna kar hai bahut KHush 'kausar'

lekin ab soch zara kya teri auqat rahi

be-sabab aaj aañkh pur-nam hai

jaane kis baat kā mujhe ġham hai

be-sabab aaj aankh pur-nam hai

jaane kis baat ka mujhe gham hai

ye dard ki hai terī mohabbat kī amānat

mar jā.eñge is dard kā darmāñ na kareñge

ye dard ki hai teri mohabbat ki amanat

mar jaenge is dard ka darman na karenge

us ne iḳhlās ke maare hue dīvāne ko

ek āvāra o badnām sā shā.er jaanā

us ne iKHlas ke mare hue diwane ko

ek aawara o badnam sa shaer jaana

parakhne vaale mujhe dekh is tarah bhī zarā

agar hai khoT to kaise chamak rahā huuñ maiñ

parakhne wale mujhe dekh is tarah bhi zara

agar hai khoT to kaise chamak raha hun main

maiñ ne har gaam use avval o āḳhir jaanā

lekin us ne mujhe lamhoñ kā musāfir jaanā

main ne har gam use awwal o aaKHir jaana

lekin us ne mujhe lamhon ka musafir jaana

tabāhī kī ghaḌī shāyad zamāne par nahīñ aa.ī

abhī apne kiye par aadmī sharmā hī jaatā hai

tabahi ki ghaDi shayad zamane par nahin aai

abhi apne kiye par aadmi sharma hi jata hai

jazbāt meñ aa kar marnā to mushkil sī koī mushkil hī nahīñ

ai jān-e-jahāñ ham tere liye jiinā bhī gavārā karte haiñ

jazbaat mein aa kar marna to mushkil si koi mushkil hi nahin

ai jaan-e-jahan hum tere liye jina bhi gawara karte hain

har marhala-e-ġham meñ milī is se tasallī

har moḌ pe ghabrā ke tirā naam liyā hai

har marhala-e-gham mein mili is se tasalli

har moD pe ghabra ke tera nam liya hai

bar-sar-e-ām iqrār agar nā-mumkin hai to yūñhī sahī

kam-az-kam idrāk to kar le gun be-shak mat maan mire

bar-sar-e-am iqrar agar na-mumkin hai to yunhi sahi

kam-az-kam idrak to kar le gun be-shak mat man mere

mañjdhār meñ naav Duub ga.ī to maujoñ se āvāz aa.ī

dariyā-e-mohabbat se 'kausar' yuuñ paar utārā karte haiñ

manjdhaar mein naw Dub gai to maujon se aawaz aai

dariya-e-mohabbat se 'kausar' yun par utara karte hain