ان سے امید نہ رکھ ہیں یہ سیاست والے

یہ کسی سے بھی محبت نہیں کرنے والے

سوال یہ ہے ہوا آئی کس اشارے پر

چراغ کس کے بجھے یہ سوال تھوڑی ہے

پر کٹے پنچھیوں سے پوچھتے ہو

تم میں اڑنے کا حوصلہ ہے کیا

پھول کتنے اداس لگتے ہیں

اے خدا ان کو تتلیاں دے دے

اس نے دو لفظ میں جو باتیں کہیں تھی مجھ سے

اس کو میں سوچنے بیٹھوں تو زمانے لگ جائیں

ہجر جاناں میں بھی آنسو نہیں آئے میرے

خشک صحراؤں میں برسات کبھی تو ہوگی

میں جس دریا میں کانٹا ڈالتا تھا

سنا ہے اب وہاں مچھلی نہیں ہے

ونواس نہیں ہوتے سبھی چودہ برس کے

کچھ لوگ ہمیشہ کو چلے جاتے ہیں ون میں

آواز لگائی کبھی تلوار گرائی

آگاہ کیا ہم نے اسے وار سے پہلے

اک رات کی دیوی کے پرستار ہیں ہم لوگ

دیتی ہے مثالیں جو ترے سانولے پن کی

کیا نیا اور کیسا کھویا چاہنے والو ڈوب مرو

ان آنکھوں کے دریاؤں میں آج بھنور بھرپور پڑے ہیں

ہم نے بھگتا ہے پتہ ہے ہمیں کیا ہے دنیا

صرف اک دانۂ گندم کی سزا ہے دنیا

آہ کو ساز بناتے ہیں دکھوں کی رت میں

دل شکستہ ہیں پر آواز سنبھالے ہوئے ہیں

ایک ہم خود کے ہیں اک گھر کے ہیں اک دنیا کے

تم اگر پا بھی سکو گے تو ہمیں چوتھائی

اے مرے دوست مرے ساتھ تری یادوں کی

ریت اتنی ہے ہوا جاتا ہے صحرا چہرہ

پریم نگر میں مانگنے والے بھوکوں مر جاتے ہیں

اس بستی میں کھا نہیں سکتا کوئی چھین جھپٹ کے

دیں دار لوگ رب کو منانے میں مست ہیں

درویش اپنے ناچنے گانے میں مست ہیں

تھا سفر ہم پے مسلط سو ہمیں چلنا تھا

ورنہ یہ دل تو کئی بار ہوا رک جاتے

میں ہوں وہ ہے صحرا ہے

اور اک پیڑ کا سایا ہے

کیسے کیسے لوگ وجود کی زد میں آ کر مر گئے

اس دریا کی بھینٹ چڑھے کیسے کیسے تیراک

خموشی کھینچ کے لائی مجھے وجود تلک

وجود کھینچ کے لایا ہے مجھ کو لا کی طرف

بکھیرتا ہے روشنی ردائے آسماں سے وہ

ستارے جیسے اوڑھنی میں پڑ گئے ہوں داغ سے

بدلتے موسموں کا ہاتھ تھامے چلنے والو

سکوں پہنچائے گی تم کو شجرکاری ہماری

وحشت نہیں ہے رقص مسرت ہے دشت میں

پیڑوں کی شکل میں یہ مرے چار سو ہو تم

دوڑتی ہانپتی آئی تھی اداسی مجھ تک

میرے سینے سے لگی اور ذرا سستائی